احنا عشقناها...وايد عشقناها



اكتب لكم ودموع عيني تهلي...

            على بلاد حبها ينعش الروح..

يادار ابوي ودار جدي وخلي...

            تفداج يا بلادي روح ورا روح..

************************

ياربي اسألك..تحفظ بلادي..وتحميها

لنا... ياكريم العطايا ..تخليها..

تبارك لنا بأرضها وسماها.. وكل من سكن فيها

*************************

قوم ياوطن ياحبيبي..وارفع الراس

حنا ذرى عينك في سود الليالي

اسمك على روس البلادين نوماس

ورسمك بوسط قلوبنا دوم غالي

*************************

مها كتبت..ولوكتبت بدمي بعد ياكويت

انتي بلادي وموطني وروحي بعد ياكويت

يادار ياللي ساكنينج دوووووووم احرار

ربي يعزج يابلد ويحميج بعد ياكويت

************************

دمتي بخير وسلامه ومن الرحمن محفوظه..يا أرض آبائي وأجدادي

من مات منهم بحرب الصريف ومن مات بحرب الجهرا..

ومنهم من بنى القصر الحمر..ومنهم من دخل غوص..واشتغل بالسفر

مخلوط دمي بين اهل شرق وجبله واهل القصر الحمر

وكلي فخر..ياكويت ..لاسمج انتسب

**********************

مشاعر ..كتبتها..لاتعبر عن كل ما يختلج نفسي الضعيفه..المغرمه..المملوءه بحب الكويت..واهل الكويت وتاريخ الكويت..وكل من يتنفس على ارضي الغاليه

أسأل الرحمن اللي عينه ماتنام..سبحانه خالق الاكوان

يحمي وطن عمري..ودار قلبي..وبيت روحي

والله يديم علينا نعمة الامان..في ظل شيوخنا الكرام

ويتمم علينا الافراح..ويرزقنا..السلام والخير

ربي..ياكريم..تحفظ بلادي

كان ودي احط كل الغناوي اللي من 79 الى 89  .. اللي عن الكويت

اللي فاضي..يقعد يسمعهم..ويبجي..مادري ليش ..بس انا لما اسمعهم اقعد ابجي

ادعوا الله يحفظ بلدنا ويحميها..ويبارك لنا فيها

وعليكم بالعافيه يا اهل الكويت الطيبين هالافراح

:)

إجازه

 

الوقت محاربني...

والساعه تعاندني...

دقايقها..منثره

ثوانيها..مبعثره

حتى عقاربها..صارت تحب الثرثره

وصارت تضايقني..

........

أبي أقعد فوق الغيم...

أو ...أركب فوق شجره..وأشوف الناس من بعيد بس مابي احد يلمحني...

يصير..إني أصير..طير صغير؟؟

بجناحين..ورديين..وأروح هناك..

وأنطر..ليييييين الهوى يردني

...........

ليش العين إذا ما دمعت تتعب...

وليش القلب..إذا ماشال هم الي لهم بالقلب كل الحب..بعد يتعب

أنا يمكن...تعب قلبي من همومي..

ولكن همكم دايم اذا شلته ...يريحني

...........

إجازه قصيره...

نعود بعدها بإذن الله أكثر حبا وودا..

نشحن بها القلوب بحب الله

ونملؤها لكم ودا خالصا لوجه الله...

كونوا بخير أنتم وقلوبكم....

..........

:)

صندوق الذكريات

صندوق ذكرياتي

أحب أنبش فيه بين وقت ..و..وقت

واتذكر..

صورة لمكان يذكرني بموقف

كلمة مكتوبة تذكرني بلحظات حلوة
كتاب اشوف فيه وجه لشخص ما...

ونوتات وااااايد...مكتوب فيها كل شي

ولما اقول كل شي اقصد كل شي...


؛)

صندوق مليئ بالايام واللحظات والمشاعر

مليئ بأشياء خارج نطاق التخزين والحفظ

ولكني احب احتفظ بكل شي يمثل بالنسبه لي ذكرى

مادري شلون فتحته..
وصار لي مدة طويله لاهيه عنه

ولقيت فيه اشياء عجيييبه

ناسيتها..

:)

اول شي.. لقيت نوته ترجع بالتاريخ الى شهر 5/1995

كنت اكتب فيها سوالفنا وحواراتنا
بيني انا ورفيجتي بالمحاضرات بدون ما نتكلم

علشان ما ننطرد او ننزف من الدكاترة..

واكتشفت اني حشاشه (نمامه) مو طبيعيه 

@@

بالبنات والاولاد اللي يقعدون معاي بالمحاضرة

فشششششللله....

كنت اكتب فيها كل اللي بقلبي

؛)

واااي ...شلون كنت سطحيه بالتفكير...

واعلق على هدوم البنت اللي جدامي وجوتيها اللي مو لايق معاها

وعلى ذاك الولد ليش مو لابس غترة وعقال ..

واقول حق رفيجتي..رايح الشاليه يمكن *-*

وغيرها ..مما لا يقال

؛)

..رفيجتي واهي تعبر عن قمة شعورها بالجوع

وعدم قدرتها على فهم الشرح لأنها تفكر بصمونة بطاط وفلافل مالت الكافتيريا

(عاد كافتيريا التجارة كانت حلوه..وونيسه..)

شلون كنت اتحلطم على الدكتور اللي حاضر على Wheelchair

بس علشان ما يغيب.. ويريحنا شويه من مادته القثيثه..(هذا يزاه الفقير)

حسيت اني كنت عبيطه وسخيفة...بعدين قلت لأ.. كنت صغيره..

والدنيا عندي ...على قدي..ما شفت من همومها شي..

بس ما قدرت اقطة..

لميته

وشميته..

وكل ورقة افتحها

اشوف فيها الدكاترة وقاعات المحاضرات

وبعض الوجوه اللي غابت عن عيوني..

صديقتي الحبيبه..تذكرين؟؟

وينج الحين وآنا وين...

الله يسامح هالدنيا شلون بعدتنا

الله...

ياحلو ذيج الايام..

والقلب لاهي..والدنيا بكبرها ما تهمني ولا افكر فيها...

اعيش اليوم بيومه..
كانت اقصى اهتماماتي

 باجر الصبح ليقمت ..شنو بلبس..

وشنو باكل ..ومتى برد البيت..

وعسى ما عندي تضارب بمواعيد الفاينل

هذي كانت اقصى اهتماماتي..

صج..كل وقت ما يستحي من وقته

وكل وقت وله أذان..

(مادري المثل راكب عالسالفة والا لأ )

كل مرة بطلع لي شي وبكتب لكم عنه

شرايكم؟؟

وبسميها سلسلة صندوق الذكريات

:)

يارب تكونون بخير وصحة وسعادة

حافظكم الرحمن

نحشة

محتاجة انحاش !!!

@@

إيي.. أنحااااش...

من كل شي

الدوام..البيت..التلفون..الاهل

بس 5ايام تكفيني..

اسوي حق قلبي وعقلي

recharge

وارجع لكم فرررررش

وابي ديرة مافيها تكنولوجيا

ولا تطور ..ويفضل محد يعرفها

يعني مابي فيها احد ينطق عربي

وحتى لو لغتهم غير معروفة بالنسبة لي هم ما عندي مانع

الله يعافي لغة الاشارة

يصير؟؟؟

اذا ماكو ارحب باقتراحات داخلية

يعني اذا في مكان بالكويت تنطبق عليه هالمواصفات

غير داري وبيتي طبعا ( لأن هذا الاقتراح اللي موصيني عليه)

بس ابي يكون فيه view حلو علشان النفسية

اقتراح اخير...

مايصير اروح امتحن عن اليهال لاني حفظت المناهج

:(((

آخر شي آخر شي

ليش التنزيلات شايشين هالايام

مايدرون عندنا امتحانات..

بوست تنفيسي..

يعني اقروا ولا تعلقون..

وبدون طنازة الله يعافيكم..

احساس يسكنني..

أحيانا ..بداية قومتي من فراشي تحسسني بيومي..

حلو ..خفيف..كئيب.. ثقيل..

واحيان اتغلب على احساس اللحظه اللي يحوشني بالتعوذ من الشيطان..

بس ان يومي يبدا يحلو..وينتصف بالحلاة وينتهي فيها .. 

ما املك بعده الا الحمد والشكر لله على ما عطاني ..

بداية يومي كانت مميزة..امتدادا لما انتهت به ليلتي..

 3 اتصالات صنعت لي لحظات جميلة  بهذا اليوم

كنت انتظر شيئا ما لمدة يومين تقريبا..

مترقبة ..للإتصال ..

أكثر من ترقبي ..لما يحملة المرسال

ومع انتهاء قضمتي الاخيرة لصمونة الافطار جائني اتصالها..

سعدت به..وانتابتني احاسيس لحظيه..تضحك..وتفشل

جني طالبة مدرسة..مداومة باول يوم دراسي

هذا كان اول احساس حسيته..

معرفتي ان في واقع حقيقي يعيش خلف الواقع الافتراضي اللي نحياه خلف تلك الصفحات الالكترونيه

هو ما جعلني اضحك من نفسي ومن خبطة البطن اللي حاشتني..

اول مرة تحاجين احد لاول مرة بتلفون..من غير ما تكونين شايفتة ..لأ !!

عيل اشفيج؟؟

الارتباط العاطفي ..يبدأ عادة بالنظر

الا انه في حالتي ابتدأ بالحرف والكلمة..

بالجملة..بالمشاعر..

بوااايد اشياء نحسها بدون ما نعرفها او نشوفها

او حتى نقدر نفسرها..

 الزين..مملوءة بالود أنا..

اتصال آخر..لكن من حبيبة الروح

أمي..عسى الله لايحرمني شوفتها..

" بنتغدا عندج..!! "

الساعة وحدة ونص الظهر وانا بالدوام

" يما شلون ما قلتوا مبجر ماسوينا شي يسوى .."

" لا تخافين ..دقيت على خدامتج الضحى وقلت لها شتسوي..!"

ابتسم..وارفع عيوني للسما..

يارب ..من غيرك بهذا الكرم..

احيانا اخاف من كثرة احاسيس الفرح بنفس اليوم واتمنى لو تكون موزعة على ايام..

بس الحمد لله.. الحافظ الله..وكل شي بامرة سبحانة

مساءا... اتصال آخر ..

من أغلى ..صديقة بالدنيا..

تبي تطلب حق بنتها rain boot

وتبيني اطلبه على صندوقي..لا وتبيه بسرعة

" ان شاااااااء الله حاضر "

" ويييييه يلا عاد لاتفلسفين علينا..تدرين فيني مالي مقاقة عالكمبيوتر.."

تامرين امر ..
احساسي باني اقدر اسوي شي يسعدها وتدعيلي عقبة جم دعوه حلوه..ما ينوصف

لكم ..
الله لايحرمني من سماع اصواتكم

وطقطقات اصابعكم على الكيبورد

ورسومات احرفكم على شاشات الكمبيتر

:)

* كنت ابي البوست بتاريخ 11/1/11

بس حسافة صارت الساعة 12 وانا للحين ما خلصت كتابة

عاد حسبولي اياة بدون تاخير..يصير!!

** بعد اذنكم التعليقات خليتهاmoderation

اجندتي



لم اعتد على تهنئة احد بالسنة الجديدة.. لعدة اسباب اهمها بالنسبة لي ..

على قولة عميمة.." كل ايام الله واحد.. مايفرق يوم عن يوم !! "

ولكن لا يمنع ان يكون لي بعض الاجراءات التي اتخذها قبل قدوم العام الجديد وهو اجراء وحيد للامانة.. شراء اجندة للعام المقبل قبل دخولة بايام قليلة ..

وبصراحة ادوخ .. حتى اجد لي اجندة مناسبة ..لاني متعودة اكتب مذكراتي من بداية مراهقتي يعني بديت من 20 سنة تقريبا ( لاتحسبووون عمري بلييييز ) وكنت استخدم النوتات الملونة واللي عليها رسومات واشكال...

وياسلام اذا كانت المذكرة من احدى سفراتي مع الاهل ...أوووووه أكشخ حدي وتصير الكتابة فيها غييير..

مع بداية التسعينات بدات استخدم اجندة الدكتور صالح العجيري ...

" الله يعطية الصحة والعافية وطولة العمر "..وطبعا جربت كل الاحجام والاشكال..

 واستخدمت في منتصف التسعينات اجندة كانت حلوة وتقسيمتها بعد غريبة وجديدة.. من تصميم الفنانة تهاني الايوب..او الايوبي ..ماني ذاكرة بالضبط.. بس ما استمرت واايد ..او يمكن انا ما لقيتها ..المهم.. وجربت اجندات متنوعة منها :

اجندة وزارة الدفاع ( هدية من قريب لي)

بيت التمويل ( دعاية ...)

البنك الوطني ( بعد دعاية ...)
حسين اليوسفي ( شارية منهم غسالة باناسونيك وعطوني الاجندة معاها)

طبعا الاجندات السابقة تندرج تحت مسمى " شي اببلاش ربحة بين "

ردينا على العجيري ( ما لنا عنه غناة ) مع اوائل الالفية .. والعام بس غيرت.. وما عجبتني المذكرة فرديت هالسنة مع اجندة العجيري.. ولسان حالي يقول :

" اللي ماله أول ماله تالي " و "عتيج الصوف ولا جديد البريسم "..

عادة كتابة المذكرات اليومية احيانا تسبب لي ارهاق فكري..وتدودهني..خصوصا اذا انشغلت يومين وما انتبهت اني ماكتبت بالمذكرة شي ...

عاد تعالي هني فججي مع الذاكرة وين رحت وشنو تغديت وشنو سويت وشنو كانت حالتي النفسية يومها وشنو كان اهم خبر في ذاك اليوم وشنو مواعيدي اللي خذيتها بذيج الحزه ... واااااي مخي بينبط !!!

اي شالله حادَج.. هذي حجوة أمي لي دقيت اسالها عن شي صار بنفس اليوم وانا ناسيتة..!!!

بس تصدقون خلاص ماني قادرة ابطل من هالطبع تعودت اني قبل لا انام اطل بمذكرتي وساعات اقلب الايام اللي فاتت واضحك عليها او يضيق خلقي منها...

لما اطالع اجنداتي القديمة..احس ان حياتي مكتوبة على ورق ..مخشوشه بين دفتي كتاب ... افكار..مواعيد..حسابات مالية.. و..عائلية.. مواليد.. وفيات... سفرات.. افراح .. احزان.. مشتريات..تحلطم (مو رفيجنا) ..مهمات....باختصار .. انا بدون رتوش

ساعات اقول لو اعطيها حق احد ما يعرفني ويقراها..شنو بيقول..ممكن يعرفني...
ممكن يحس بنفس الاحاسيس اللي كتبت فيها الكلمات بذيج الحزة والا صعبة؟؟؟

طبعا انا يتني عروض قوية جدا ومالية !! بس علشان اخليهم يقرون لو صفحة وحدة

بس انا موصيتهم وصية .. محد يقرا مذكراتي الا بعد وفاتي .. ( يعني منهم)

( قولوا بعد عمر طويل ان شاء الله )

:)

يارب تكونون باحسن حال..

والله يبارك لي ولكم بكل اوقاتنا ..

أعترافات ..مواطنه

اعترف اني سأعترف ببعض من خفايا شخصيتي

اعترف اني  احب الكويت ..حبا يوازي حب ابنائي..

اعترف اني عصبية  وافقد اعصابي بسرعة..

اعترف ان التزامي الديني هو سبب راحتي النفسية..

اعترف اني مو قد كلمتي بالبيت..واوامري دائما مكسوره وغالبا برضاي..

اعترف اني امارس الكذب احيانا.." واعلم على روحي تالي "..(ادري تفاجئتوا !!)..

اعترف ان الماجستير والدكتوراه ما زال وسيبقى حلمي الذي ادعوا الله ان يتحقق..
اعترف اني احب السوالف والقصص وخصوصا عن ايام اول..

اعترف اني ما انسى الاساءة واي موقف من الشخص نفسه ممكن يخليني استرجعها ..(طبع مو حلو )

اعترف اني اتضايق اذا ما قدرت اقنع اللي جدامي بوجهة نظري..

اعترف اني اعشق شي اسمة بيديان بكل حالاته..

اعترف اني احب العدل والعداله والعادلين( مادري العادلون )..

اعترف اني اخاف من الزهيوي وعادي اركظ حتى لو بالشارع وجدام الناس

اعترف ان عندي صندوقين وسلة من ملوت ايكيا متروسين اغراض من جناطي اليومية يبيلهم فرز وتصفية وصار لهم سنتين تقريبا..

اعترف اني شقردية وطير شلوة وابيض الويه وقدها وقدود..الله يحفظني ..قولوا آمين

اعترف ان امي ماعندها غيري..

اعترف اني اكلم نفسي وااااايد..وافرغ شحنات الغضب منها ..بس ساعات هالطبع يحرجني =(

اعترف اني حبيتكم ..والله العالم بخفايا القلوب..

اعترف ان عندي فقط صديقتين مخلصتين ومقربتين من نفسي والباقي والنعم فيهم بس لكثرة علاقاتي الاجتماعيه ما اقدر اخلي الكل قريب مني
وهذا اعتراف آخر إني انسانة ولله الحمد اجتماعية واتعرف على الناس في اي وقت واي زمان..

 

مشكورة يا مي على تحويل الاعتراف لي واكيد خفتي لا ازعل مثل سالفة   التاج  واسويها بروحي ... ( فشلانه من نفسي ..حييييل) 

؛)

شرد عليها؟؟؟





هذا ويهي لما انسأل سؤال ومااعرف اجاوب صح ..
والتالي ...نموذج لبعض من الاسئلة الي يتفضلون فيها عيالي المصونيين ويوهقوني بالرد عليها...
طبعا الحوار مو بالضبط لأن هالسالفة صار لها جم يوم... يعني في شوية رتوش..بس المضمون والفكرة الرئيسية للدرس قصدي البوست ..كما هي...

--------------------------------------------------------------

هي: يمااا...

أنا : .......

(كنت قاعدة اقرا كتاب وفيني طبع مو حلو ما أرد من اول مرة)

هي: يماااااااااا ( بإلحاح هالمره...)
أنا : نعم يما..
هي: يما ..احنا متى بنموت؟؟
أنا : ( بعد أن التفت اليها بخوف من هذا السؤال..الذي وان آمنت بالموت الا اني أخافة...)
      حبيبتي.. ليش تسألين يما هالسؤال احد قالج شي؟؟
هي: لأ .. بس إنتي كله تقولين كلنا بنموت محد يعيش الى الأبد!

(ياربي شسوي احيانا مو على طول احيااااااانا....ماافرق بين الحجي جدام اليهال وجدام الكبار)

أنا : أكيد يا أمي كلنا بنموت بس متى ما الله اراد مو بكيفنا ..الله اللي يقرر متى انا اموت ومتى انتي اسم الله عليج او اي واحد بهالدنيا يموت .. بس انتي ليش تفكرين بهالشي مو زين؟؟ انتي الحين صغيرة وهذي الاشياء مو زين الصغار يفكرون فيها..
تقاطعني..
هي:يما.. ترى مو بس الكبار يموتون... تذكرين لما شيخة صديقة مريم ماتت لما كانو برابعة..؟؟؟
انا :... اي يا بعد قلبي اذكر ..الله يرحمها ..يارب
هي:...يما انا ساعات لما اتذكرها ...ابجي وانتي ماتدرين.. مسكينة تكسر خاطري
( طبعا انا لامتها وماسكة دموعي غصب )
هي:يما الموت يعور ..يعني احنا نعرف اذا بنموت..؟؟؟
انا:ياعين ابوي انتي..
الموت ...شي احنا مانقدر نشوفة او نعرف متى ايي  بس الانسان اللي يطيع ربة ويسمع كلام امة وابوه وما يسوي شي غلط او عيب الله يحبة وحتى لما يموت مايحس انه ميت ومايتعور
(طبعا انا ادري ان كلامي نصة غلط ..يمكن ...بس حقيقةً.. انا في هذي الأسئلة افقد القدرة على الاجابة باجابات منطقية...ولاحظوا اني دخلت طاعة الوالدين ؛)...لازم )

تلمني وتصمت لدقيقة تقريبا

وتقلب الحوار 180درجة 

:)

هي:يما ...يدتج كبيرة واااايد بس للحين ما ماتت وابوج اهوولدها ومات قبلها ليش..؟؟؟يصير؟؟؟؟

هني انقلب الحوار الي كوميديا درامية
طبعا انا تركت لدموعي العنان...اهي فيني بجوة.. ودخلت معاها الضحك عشان ما تتأثر بنيتي فيني...

انا: ياعلج العافية اللي تعافيج ...قولي ماشاء الله لايصير في يدتي شي..والله اذا سمعت كلامج ..بيحوشها جلطه...وما راح تدخلكم بيتها ابد ابد...

هي:..يما لاتقولين لها...يعني لازم تقولين...ترى انتي كله تقولين سوالفنا حق خالاتج...مرة ثانية ما نعلمج اسرارنا...

( فعلا ..بناتي كلة يجكوني احش فيهم...)
مو خوش ام ...
؛)

انا: لا والله ما اعلم... اصلا اخاف اقولها تزفني...

-----------------------------

انتهى الحوار..
وجلست بعده بفترة افكر...
هل فعلا نحس بالموت قبل ان يصل..
وهل للموت الم..



المهم ...
احيانا أسأل من قبل اطفالي الله يحفظهم بأسئلة لا أجد لها في مفرداتي اجابة
بالكويتي اتوهق....
وما اقدر ما ارد لأن انا مصدر ثقتهم ومرجعهم..
وهم مابي اعلمهم شي غلط...
والله ساعات ودي اسوي ستوب للزمن واروح ابحث عن الموضوع بعدين ارد اقولهم

شسوي اذا انسألت سؤال ما اعرف ارد علية؟؟؟

فشلة ...أم .. أووومم ... وما تعرف ؟؟
مو حلوة بحقي   :)

بالدوام..

آنا ما اعرف اسطر الحجي
واكتب كلام مرتب ومصفف ومصقول ومدوزن

اعرف اكتب مشاعري ...اي
 بس ارتبها واسوي لها ريسايكل... لأ
احب اسولف لدرجة ان ممكن اللي جدامي يمل وانا ما ادري
:)


كل يوم اقعد من النوم على امل ان اليوم احسن من امس بإذن الله
وباجر بيصير بعد اجمل
دائما ما أردد مقولة د. محمد الثويني الله يجزاه خير
" احنا بخير وفينا خير "


في بداية اليوم العملي ( على وزن اليوم الدراسي )
بمجرد ما اركب سيارتي..وادقها سلف..تبدي رحلة يوم العمل بالنسبة لي
ممكن هالرحلة تترك اثر ايجابي طويل ولله الحمد بسبب اذاعة القران
وممكن تترك اثر سلبي (..بس وقتي..) ما يطول اكثر من 1/2 ساعة
بسبب وقاحة احدهم ..بالطريق
المهم ..

الزحمة ..موسمها معروف
من سبتمبر الى مايو
وباجي شهور السنة (ترى كلهم 3شهور)
الوضع عادي وحلو وممكن اوصل الدوام بربع ساعة
انا مو من النوع اللي يتضايق من الزحمة لاني دائما اطلع مبجر ولله الحمد
وحتى لو تاخرت
سهالات السالفة ...ما اقث عمري على تاخير


احب شغلي وااايد ولله الحمد
واحب الجروب اللي معاي
انا طبعي اعامل الناس باخلاقي مو باخلاقهم
افقد اعصابي احيانا..اكيد
لكن الحمد لله عمري ما قليت ادبي على احد
ولا احب اطول لساني او اتحجى بصوت عالي
وكله اتذكر حجوة ابوي يعلة الجنة
" انتي صورتي جدام الناس
بالج تخليني استحي ادش الدواويين من شي سويتييه "
هالكلمة ربتني ... ما تصدقون شلون!!


وفي العمل ... تمر عليك نماين.. الحمد لله الذي عافانا


ناس ..طينة ينه (جنة )
وناس ..منكر حسنه


ناس..سنع وادب
وناس..قمة في قلة الأدب


ناس..مالهم شغل فيج
وناس..بس يقطون بلاويهم عليج


عاد آنا ولله الحمد فيني ميزة...أعرف اختار ربعي صح
وسبحان الله..اللي مثل نمونتي..يتمون معاي واللي فيهم شوية عواية (عواجة )
لالا .. من زمان العلاقة  " السلام ... وعليكم السلام..وبس "


مواقف اتذكرها عنهم..


بلال.. الفراش
واستفتاح السلام وصباح العمل بويهه لأن أهو أول واحد قاعد عند باب الادارة
حمال الاسية..والطعام.. والاوراق..والاستكانات.. والفناييل..ومطراش يمين ويسار..وروح السيارة وييب من السيارة ..وروح للمطعم برة .. بس هم الجانب الايجابي في الموضوع انه احنا نبره دايما اذا عندنا نقصة ( اكل ..فلوس..حتى هدوم عطيناه )


التقي باحد الموظفين في ممر الادارة ...
" ازيك ايه الاخبار..."
تقول انا من اصحاب التجارة !! اخبار خير يا عساك بخير.. احيانا ارد علية بالكويتي القلج مسكين يقولب عيونة مافهمني
عاد بسرعة اقلب الموجة مصري .. او عربي بسيط .. ابتلشت بحجي العيايز
 طبعي اسلم على كل من القاه في طريقي الى مكتبي
حتى المكاتب اطل فيها واسلم
من باب افشوا السلام بينكم
وتبسمك بوجه اخيك صدقة
 فلانة #1#
السلام عليكم
وعليكم السلام هلا والله
شلونج
بخير الحمد لله


فلانة #2#
السلااااام عليكم ( دليل على الميانة شوية )
هلا والله عليكم السلام
شلونج ..وشلون اليهال
والله بخير ..شلون عيالج
تمام ..شلونكم مع الامتحانات ..والله اليهال لاعت جبودهم
بعد..شنسوي..يعين الله
ها طلبتوا شي ..؟ (اذا ماتريقت ما اعرف اشتغل )
لا.. ام عبدالله دازة مسج تقول يايبة ريوق
اكيد جباتي او صمون فلافل... :)
يلا نعمة..
خير ..انا بروح مكتبي على ما تيي..


فلانه#3#4#5#
(مجموعة تقعد دايما مع بعض )
السلام عليكم
وعليكم السلام..
شلونكم بنات ان شاء الله بخير
الحمد لله..


اذهب الى مكتبي..افتح الليت الداخلي للمكتب
اقعد على الكرسي..افتح الجهاز..اطلع التلفون من الجنطة..احطة على المكتب
اطلع مفتاح درجي..واحط الجنطة بالدرج..واسجل بالنوتة جم الساعة بصمت علشان احسب تاخيراتي ؛)
اذا عندي استئذان كتبتة وزهبتة..عشان ما انسى..
اجابل الشاشة.. لحد ما يتكاملون البنات.. ونتيمع عالريوق لمدة نص الى ساعة
وبعدها صلوح ملوح اللي يدل مكتبة يروح


ومابين الشغل ..والمعاملات ..وتبديل الشاشة من نظام العمل الى بوستات ربعي الحلوين ومواقع الهدوم والجناط..وتلفونات الخدم وشنو تبين غدا..واحاديث هنا وهناك.. ينقضي يوم العمل ..
ولاينقضى حتى اقول لكم عن ..
حبيبة قلبي..

ام علي..
دائما ما اسبقها بالوصول ..واحيانا نلتقي في مواقف السيارات ونمشي حتى نصل المكتب حيث اني يارتها واهي نعم اليارة (الجارة )..
بدون وجودها ..ربما لم اكن لأستمر في العمل ..ببساطة هي من اهل الجنة.. ليست من اهل الدنيا.." اسم الله عليها الله يحفظها "
هي صورة لحسن التعامل بينما الآخرون كوبي من صور اساءة الحوار والمعاملة
احبها في الله ولله..
لها تاثير كبير في حياتي العملية والعائلية
تاثير ايجابي..ولله الحمد

المديرة...
انسانة..صديقة..مسؤولة..تفخر بانها مديرتك..
الله يبارك لها يارب...
لي معها عدة مواقف..طيبة طبعا :)
بس روح العمل عندها اهم من العمل نفسة
تحرص على الود بين موظفين الادارة وتقدر كل من يعمل
لم اظلم عندها ولا مرة والحمد لله
تستمع الى الشكوى بعين وقلب مفتوحين..
تسال قبل ان تحكم.. وهذا مايميزها..
يزاها الله خير ..






ساعات افكر..!!
المكان اهم او الاشخاص اللي معاك في العمل
حتى تستمر بالعطاء اللي تتمنى انك تعطيه


عن نفسي.. الشخص اللي معاي له دور..اذا كان المكان زين
بس اذا المكان مو زين..حتى لو الشخص اللي معاي..منو؟؟ مالكم امل اقعد
وشخصيا غيرت مكان عملي مرتين..والثالثة ثابتة  :)


نلقاكم  على خير..
حافظكم الرحمن اللي عينة ماتنام
( احب هالدعوة )

رحلة الخيال والجمال

مساؤكم خير يارب

ومرشوش بماي الورد
ومبخرينة ابخور الشايع وداهنينة بعود جنيد


شتبون بعد ... خنينه الريحة صح!!!
شميتوها....
؛)





في رحلتي....

سبحت وهللت..

كلما مريت بجبل او نزلت بسهل

ذكرت الله كثيرا في رحلتي الى جبال كابرون

وزل ام سي الساحرة

وروعة الريف الالماني

غارمش ...وبديع صنع الخالق

لوحات صورها ربي فسبحانة جل في علاه

لا امل من الطبيعة مهما رايت

تبهرني روعة التقاء الجبال بالبحيرات

وكيف تشق الغيمة طريقها بين الجبال الشاهقة

غير عابئة بعظيم حجمها

اعتبرتها رحلة تامل  واسترخاء

ما رحت السوق الا مرتين بس ؛)

اصلا سوق ميونخ مايشجع

طبعا اقنعت نفسي بهالحجوة ؛)

وبيني وبينكم ما كو احلى من سوق لندن

طولت عليكم...

اليكم بعضا مما التقطته كامرتي

 تصدقون صورت فوق ال600 صورة بس مناظر طبيعية

غير صور عيالي..

مادري اطبعهم وابيعهم..

:)

اللي يبي ترى حقوق ال copy & past مسموحة وحلالكم

سالفة صغيرونة...

ياصباح الخير عالناس العسل والله

حبايب قلبي شلونكم ياحلوين

بنتي مسكينة طايرة من الفرحة امس بالمطر

تقول يما بس نتفرفر بالساحة مانبي اندش صفوفنا

الكويتيين مساكين شوية مطر يفرحهم

وينعش قلوبهم..ويغسل جبودهم...

عسى الله يرزقنا من خيرة واهو اكرم الاكرمين

ماعلينا...

عندي لكم سالفة صغيرونة...
 سمعت هالسالفة من وحدة ما اعرفها بس كانت معاي بدورة

وكنا نتكلم عن الحظ... وهل الانسان ينولد محظوظ والا بإيدة يصنع حظة

وانا بقولكم هالسالفة...

(عاد الكلام  بين الاقواس تعليقي على نفسي وانا اكتب )

قالت...

كان في امراة يابت بنت

(لا حلفي ..صج والله )

وهالبنت لما كبرت شوية بينت ملامحها انها مو جميلة فيها جكر

فقالت لها امها لا تشوفين نفسج بالمراية ابد كلش لو شنو يصير ...

( مراية ... مو منظرة..ترى تفرق!!!)

وابعدت عنها كل المرايات اللي عندهم بالبيت ..

(شدعوة بيت خليفة القطان الله يرحمة...)

 وكانت الام كله تقول للبنت انتي حلوة وجميلة ويابخت اللي بيتزوجج

(ياعيني عليج ... ويقولون لازم تدرسون علم نفس الطفل عشان تعرفون تعاملون عيالكم عدل...) 

مرت السنين وهالبنت ياها نصيبها..

(سبحان الله ...محد يقعد بذيج الايام)

وتزوجت رجل جميل وخلوق... بالكويتي ماينتطوف..

(............................)

عاد امها ردت نبهتها على نفس السالفة

(موتفرحين بالريل وتنسين وصاة امج ...)

وقالت لها بالج تشوفين نفسج بالمراية ترى يصير لج شي مو زين...

مرت الايام...

(ماصارت خلصينا نبي الزبده)...

وماتت الأم...

( بدون بجي ترى قصة مو صج..)

عاد البنت حزنت على امها وزعلت وتمت وحيدة

وفي مرة كانت قاعدة بالدار بروحها وريلها مو بالبيت

قالت لروحها خل اشوف روحي بالمراية

(مصرة على مراية...والله جذي البنت قالتها لي )

ولما شافت... وياليتها ما شافت..شتشوف..جكر اللهم ياكافي

حتى اهي اخترعت من روحها...

(الله يرحمج يا امها.. ما سمعت كلامج)

عاد المسكينة قامت تبجي..وتفكر شلون ريلها صابر عليها ومتحمل يشوفها

(شنقول ... القرد بعين امه غزال)

وماتحملت نفسها ...قومي اخذي بقشتج..وغريضاتج..وطلعت من البيت..

وراحت بدون ما تدري وين بتروح

عاد المسكينة..(سجينة ..ليش ما سمعت كلام امها)...

قعدت على اليال وغفت من التعب...جان تحلم

(خيرا رأيت...)

إن في واحد يايها يمشي وجمالة تبارك الرحمن..حلو حيييل...جان يقولها يافلانة قومي روحي بيتج ترى ريلج يدور عليج وعيالج يبونج...( نسيت لا اقول انها عيلت..).. جان تقول له انا مو حلوة وجيكرة وما ابي ارجع حق ريلي انا مادري شلون اقدر اخلية يشوفني عقب ما شفت نفسي..

(يبا الريال راضي.. وبالعها وساكت..وبعدين عقب العيال ياييه اتعنفقين..اهو خلصينا بس ردي بيتج اليهال ماتووا من اليوع يبون لقمة..)

جان تقول له انت منو ؟؟؟

قالها : انا حظج الحلو اللي ريلج يشوفني فيج...اهو يشوفج حلوه لأن حظج حلو اللي اهو آنا...ياحلوك والله

(اهني مربط الفرس وزبدة القصة ..)

بس خلاص ..خلصت

:)
ادري تضحك..ويمكن تقولون سخيفة بعد..بس عشان اخدم الموضوع
شلوني معاكم

يعني قصدهم ان الحظ اهو اللي خلاها جدام ريلها حلوة وما شاف فيها الجكر اللي امها خشته عنها سنين

بدليل انها كبرت وتزوجت وعيلت بدون ما تدري انها جيكرة وما اثر عليها هالشي لان حظها حلو ويكسر الصخر بعد

( اللهم لاحسد..)

لكن...

هل الحظ من الله

ام من نفسي..؟؟؟

وهل قول الله سبحانة.." وما يلقاها الا ذو حظ عظيم " دليل على ان الحظ من الله

وهل نؤمن بالحظ؟؟ ام نصنعه لانفسنا

فكروا فيها هالويك اند وعلموني تالي

تحياتي لكم..

دعاء ورجاء



في هذا اليوم الفضيل

وهذه الساعات المباركة

اسأل الله

ياخير من سأل

واعظم من رزق

ياذا الجود والكرم

ياحنان يا منان

ياااااااارب

اسألك

أن ترزق وطني الأمن والأمان

وأن تؤلف بين قلوب أبناء وطني

وأن ترزق الكويت اياما كلها خير

وان تحفظها بحفظك

وان تجعل الشر في من ارادها بشر

اللهم من اراد وطني بسوء فرد كيده في نحره

اللهم احفظ الكويت

اللهم احفظ الكويت

اللهم احفظ الكويت

يامن تطلع على القلوب

أنت تعلم هم قلبي

فاجعل روحي معلقة بحبك

ولا خير فينا ان لم نحفظ لهذه الارض حقها

 مهما حصل ومهما سيحصل

لن نفقد الثقة في هذا الوطن

أبداااااااااا

والا شخانت هالدنيا بلا ساس

وانا ساسي وتاج راسي انتي ياكويت

همسة في اذن الكل

وآنا أولكم

" النعمة تبي حمد وشكر ترى النعمة زوالة  "

وما 2/8 عنا ببعيد

فلنتذكر ولا نغفل

ولنضع الله والوطن امام اعيننا

في القلب غصة

وفي العين دمعه

وفي النفس أمل

وفي الروح هوى

وآنا هواي انتي يا احلى بلد