نقاش حااااد

تساؤل جميل كجمال طفولتها النقيه....

تسائلت صغيرتي عن تاريخ انتهاء علبة حليب النسكويك.. وكان مكتوبا عليها

تاريخ الانتاج2010

تاريخ الانتهاء2013

فقالت..:

يما شلون كاتبين عالقوطي ينتهي 2013..في سنه اسمها 2013؟؟؟

فأجبتها ببساطه..:

إييي..في سنة 2013 بعد سنتين ان شاء الله يصير سنة2013

فردت حائره..:

يعني شلون..؟؟ ..إحنا الحين بتخلص السنه وجم بنصير..2012 صح؟؟

انا..: صح...

هي..: بعدين شلون تصير 2013..يصييير..؟؟؟

انا..: هي مسألة رياضيات حبيبتي جمعي على كل سنه عدد واحد وتصير السنه اللي وراه

هي..: @@   يعني احنا بنكون عايشيين لما يصير التاريخ 2013

انا..: يعلج العافيه..اي ان شاءالله..ليش انتي ماتعرفين السنه كل سنه تزيد واااحد

فاولتي علينا بالموت ليش..؟؟؟؟

ترى مو واااايد  بعيد التاريخ كلها سنتين وتصير السنه بحيل الله2013

للحين ما دشينا 2012 واحنا نتناقش على 2013

وبيض الخعفق

والا فرخ الخعنفق

:)

أتمنى من الله العلي القدير أن يجعل سائر أيامنا في طاعته وأن يستعملنا برضاه وأن يبعد عنا ويبعدنا عن ما يغضبه ولايرضاه

كم أفتقد وجودي بينكم..

وكم أفتقد وجودها بيننا..(سله)

يارب أسعدها أينما كانت..وأفتح دروب السعاده على قلبها وأكرمها برضاك

صندوق الذكريات..بعد مره

للذكريات عبق جميل..وأجنحة من خيال..تحملنا لمكان ما... كنا به سابقا
مع اختلاف الزمان واختلاف النفوس..لتصبح الذكرى هي الامل الوحيد في التواجد بمكان
لايمسه التغيير ممها جرى...

ونبتدي بسم الله...


فتحت الصندوق العجيب اللي قلت لكم عنه قبل هالمره...

صندوق الذكريات 

هالصندوق موجود عندي بالدار ومسكر

بين فترة وفترة اقعد انبش فيه.. وابسط عالارض

يعني أطول وآنا اتذكر ..  :)

هالمره كان في ملف اعرفه زين..واحبه..لما يحمل بين دفتيه من ايام جميله لم اكن احس بجمالها الا بعد اعوام واعوام
فتحته وقعدت اقلب الاوراق اللي فيه ولقيت بوردنج باس مالت الطياره ايام ما كانوا يعبونها يدوي تذكرون..الحين كل شي برنت اوت..اول كنا وايد نطول عند الكاونتر الحين ماكو دقايق وشغلك خالص حتى جناطك توديها قبل يوم..

طبعا صورتها لكم علشان تشوفون اشكثر اهي قديمه..قبل عشرين سنه تقريبا

أيام ...
كنا ما نعرف نسافر الا عالكويتيه ... والحين ما افكر الا اذا تسنعوا مع اني اذا سافرت على اي طيران ثاني يفز قلبي اذا شفتها بالمطار..

ودي انقز واقعد فيها :)

ولقيت ورقة اختبار اللغه الانجليزيه للسنه الثالثه ثانوي وطبعا الورقه صفرا ويابسه يعني اثريه صارت وكلها جم سنه بعد وابيعها بالمزاد
؛)

( الظاهر اني كنت وايد مستانسه بالدرجه علشان جذي احتفظت فيها طول هالمده) 

؛)

بعد صورت لكم الورقه وشوفوا شلون كنت مجتهدة وشاطره..هذي عاد ببروزها وبحطها بالصاله واخليها درس عملي للبنات عن الجد والاجتهاد..

=)

تبون الصج عاد ...عيال هالوقت مايمديهم يدرسون ..تلفزيون وتلفونات وطلعات والعاب الكترونيه ماتخلص

(سوني-بلستيشن-ننتيندو-دي اس-BB-ايفون.....الخ)

احنا بزماننا إذا ملينا من الدار طلعنا بالحوش

واذا بنطلع من البيت رحنا بيت الجده او بيت احد الاقارب

الله يعينا على تربية عيالنا ويحفظهم لنا ربي

الحلو في الذكرى..استرجاع المشاعر الحلوه طبعا...لأني ضد فكرة الاحتفاظ بالذكريات الاليمه..والله الواحد اذا ضاق خلقه يقعد يبطل له شي قديم..ويعيش كل احساس اللحظه الماضيه..تصدقون أحيانا لما اتذكر مكان واشخاص يتراوالي حتى ريحتهم اشمها..

 

وإلى أن يمر في بالي افتح صندوقي مره ثانيه

اشوفكم على خير

والله يجمل ايامكم بالطاعات

:)

لكل القلوب التي أحب

لما الواحد يغط شويه عن ربعه ويلقاهم عقب فتره يستحي منهم ومايدري شلون يبرر غيابه

بصراحه...مابي اختلق اعذار لغيابي

وماقدر (ما) أتعذر منكم

هي شوية ظروف

كانت في العمل وتطورت للبيت وبعدين تعودت الغياب وصار عاده..

المهم...

ولهت عالتدوين...

وعالتخربط عند ربعي والناس اللي تقرا همي وفرحتي وتشوف روحي من ورى الشاشات..

قلبي متروس حجي فيه الحلو وفيه اللي يقث..

هم الوطن بلا شك يغلب على كل هم..

ولكن..

من منا لايتفائل بأن القادم حتما ولا بد سيكون أجمل بإذن الله

والله سبحانه لايخيب رجانا قولوا آآآآمين

ماااااااا...أنكر إن اللي قصوا علي وخلوني أدش تويتر كسبوا فيني طيب أأأأد الدنيا

(الزين..حبيبة قلبي)

تواصلي من خلال الطائر الأزرق خلال هالفترة الماضيه معاكم كان يهون علي ابتعادي عن مدونتي

بس ..لي نسينا الحمد شنصلي فيه..

مالي عن الليوان غناة...

هي بيتي ومكاني اللي فيه عرفتكم..

ولها الفضل في علاقات الود اللي جمعتني

بأغلب المدونين..

بإذن الله هذي آآخر الغطات..

؛)

يارب في هالايام الفضيله تقبل منا اعمالنا ودعواتنا واحفظ بلدنا الحبيبه

وألف بين قلوب ابنائها وسامحهم 

وارحم موتانا وموتى المسلمين أجمعين 

يااااارب

لاتنسون الكويت من دعائكم في هالايام

وذروا البيع...من يعرفها؟؟

من النادر...قليلا جدا...ما أخرج صباح يوم الجمعه من بيتي..

ولكني اليوم..قررت كسر الروتين..لأني أجلت الزواره الى العشا!!

فقلت لنفسي(وياكثر ما أقول لها..)خليني أفاجئهم بطلعه غير محسوبه ولوجبه محبوبه ..الريوق..

بالضبط..نص ساعه والكل تحت بالسياره..ياسلام..صاجين الأوليين

"شهوة القلب..عويين"

وطبعا كان إختياري المارينا كريسنت لأن الجو كان ظاهريا غيم..بس للأسف كان خاش بين ثناياه بعض الغبار المتنكر..!!

ولله الحمد استمتعت جدا بالجو والوجبه طبعا...  ؛)

كانت الساعه تقريبا 11 فكان هناك اقتراح مستحي..وهو الدخول الى المارينا السوق

وأخذ فره صغييييييييره..ما نطول بس نشوف ما نبي نشتري ...

وآنا أتمشى..أذن الظهر ..

ولأول مره أستحي..إن الظهر يأذن وآنا بالسوق..لأن اليوم الجمعه

والله سبحانه وتعالى..قال في محكم التنزيل..:

"يا أيها الذين آمنوا إذا نودي للصلاة من يوم الجمعة فاسعوا إلى ذكر الله وذروا البيع ذلكم خير لكم إن كنتم تعلمون"

واللي نبهني بعد..إتصال من الوالده..:

موعادتج تطلعين هالحزه..اليوم الجمعه..؟

وبعدين ترى مكروه البيع والمشترى حزة الصلاة والأذان..!!

أدري..وكاني قطيت اللي بإيدي ورايحه السياره....

نقطه..أعلم أن أغلبكم يعرفها..ولكنها غابت عن بالي اليوم وحين تذكرتها..أحببت تعميم الفائده..والأجر لنا أجمعين..بإذن الله

والمنع يكون بعد الأذان الأول وصعود الخطيب المنبر ...

والله أعلم..

الحين المشكله بالهدوم اللي كنا زاخينهم..وخاطرنا فيهم..يعني فيها طلعه ضحويه باجر اذا الله راد..

نقطه بعيده جدا جدا عن السالفه...بس شغلت بالي هالنهار

المرأة اللي تشرب الشيشه أمام الناس بدون حياء ...ماذا تريد أن تثبت؟؟؟؟؟؟

مزاج..

قوة شخصيه..

؟؟؟؟؟؟؟؟؟؟؟؟؟؟

الحمد لله الذي عافانا مما ابتلاهم به وفضلنا على كثير من خلقه تفضيلا

إغتشمااااااار

الخميس...

تعودت على إحترام الآخرين..واحترام حرياتهم..ولا أحب التعدي على خصوصية الناس أو حتى أصحابي..مالم يشاركوني بإختيارهم..في أمورهم الخاصه.

يوم الخميس الماضي بالليل ..تقريبا الساعه11 مساء..كنت عائده الى البيت على الدائري الخامس بإتجاه السالميه..مقابل الأفنيوز..قبل المدخل الفرعي الى خيطان..على يساري اليرموك..

كانت هناك قافله من السيارات تسير على ثلاث حارات..بسرعه بطيئه..تقريبا 100كم والفلاشات شابه..وبعض من بالسيارات قد قام بإخراج نصف جسمه من الدريشه..

وصوت الغناء عالي والهرنات..حدث ولا حرج..

السالفه ومافيها زفة معرس..

@@

نعم زفة معرس...

سدوا فيها ثلاث حارات في خط سريع ورئيسي

وطبعا كاميرة التصوير الفيديو..شغاله تصور في الناس الماره وخلق الله اللي بالشارع وتصادف مرورهم بنفس اللحظه

ناهيكم عن الازعاج بأصوات الهرنات العاليه والمتواصله

والمستعيل من البشر ماعليه الا أن يأخذ طريق حارة الأمان لأن المصور كان يمشي على الحاره اليسار..

طبعا إقتثيت لين قلت بس..

بصراحه..ماقدرت أتحمل التصرف..

قمه في قلة الذوق والأدب..

والناس مساكين اللي يايين من بعيد..حسبالهم في حادث ويطقون بريكات ..ويشبون فلشرات..

الله يهديهم...مو جذي الفرح ..كلش أبدا مو جذي

الجمعه...

يوم الصفاء الروحي ...تقريبا اليوم الوحيد اللي تشوف فيه صبيان من عمر ال5 الى 12 سنه لابسين دشاديش ويمشون مشي
رايحين المسجد طبعا..الله يحفظهم..
مشاوير × مشاوير
صلة رحم
غدا الزواره اللي له طعم غير ونطوعه عجيبه..مادري شنو السر..من يوم إحنا صغار..الغدا في يوم الزواره غييييييير...حتى سلطة الخيار وطماط بس..تصير لذيذه
أكون في هذا اليوم سايق بكل فخر للوالده ربي يحفظها لي..
ومايمديني أنسدح على الغنفه..
إلا طرا لها طاري..
وبكل طيب خاطر..أقول إن شاء الله ...ولسان حالي يقول:
عساني بس يا يمه عساني
أوفي شوي من حوفج سنيني

أرد البيت ...وكلي شوق إلى أن ينام أبنائي في السياره ومستعده أشقلهم وأزخهم وحده وحده..وأصعد فيهم الدري..لين ينقطع قلبي..بس ينامون..ولسان حالي:
وأمني الروح في لم المخده
وأحطه صامتن هالآيفوني
وأشوف النومه لي مستعده
وأغمضها بسرعه عيوني


السبت...
يكون يعني هذا يومي..

أقعد من الساعه 8صباحا..
ليش..والله آنا خوش بنيه..وسنعه ..وماضريت أحد
أقعد بروحي والكل نايم..ومو راضين يقعدون..ويروح علي النهار وما أتريق أنطر الله يحفظنا وانتكامل عالريوق..متى..11:30...هذا برنش..مو بريكفاست

طبعا...يوم السبت..تفلسفت شويه وقلت لهم آنا اللي بطبخ اليوم..
ومتى كلينا الغدا..3:30 هذا وآنا شاده حيلي..
ومابين تسيوره عائليه عقب المغرب
والمرور على المقرر السبتي للعشاء..بيت الماكدونالدز

أستلقي على فراشي..وأصوات صراخهم تخبرني..بأن الحلم الأزلي في نومه باكره يوم السبت عمره ماراح يتحقق..
وتدخل علي بنتي..لتخبرني بأن أبله التربيه الفنيه ترغب في بعض أوراق القصدير والقطن وأوراق ملونه..
قلت لها:
كل شي موجود وأخذي القصدير من المطبخ تحت..
@@
يما...أوراق قصدير..مو قصدير مال المطبخ..شنو إحنا بنطبخ؟؟!
يا ماما نفس الشي..ورق القصدير نفس قصدير المطبخ بس مقصصينه وحاطينه بدفتر..وآنا مالي خلق أروح المكتبه الحين..
يما..عن الإغتشماااااار...
نزلت على الكلمه كالصاعقه..وطيرت لذة السدحة من عيني..
وشرقت بريجي..
شنو قلتي..!!؟؟
يما مانبي إغتشماااااار الحين..وديني المكتبه مابي أفتشل باجر ويضحكون علي البنات ويقولون يايبه قصدير مطبخهم...
لحظه لحظه..شنو قصدج إغتشماااااار..غشمره..؟؟؟!!!
إيييييي..يمه ...يعني ماتعرفين..لاتعيبين
وأغيب في ضحكه طويله...بصراحه خلتها تحقد علي..وطحت من عينها..لأني لم أراعي فرق العمر ولا الحاله النفسيه لها وإهي تحاتي باجر..
آل إغتشماااااااار آل
لي اليوم وآنا أضحك عالكلمه..

بس شرايكم في بنتي (8سنين عمرها الله يحفظها)....حصيلتها اللغويه بديعه..!!!
:)

هل أعددنا الزاد للرحيل..

صوت إستلام رساله...

.....

أفتح الهاتف عالوتس أب

رساله من زميله بالعمل

" عزاء..........

العنوان........والعزا من باجر..لاتنسونها بالدعاء."

تمر علي الثواني وكأنها دقائق..

أعود لأرسل

" منو المتوفي؟؟؟"

وكأني أريد إسما غير إسمها..

فترد

"إهي المتوفيه..كانت مريضه من زمان..واليوم ذاعوا إسمها..الله يرحمها.."

صدقا...

أكتب والدموع تخالط أحرفي..وأكاد لا أرى الأحرف أمامي على الشاشه

لا أعرفها معرفة شخصيه..وعلاقتي بها لاتتعدى سلاما عند شاشة البصمه وحديثا عاما لايتعدى في مجمله الدقيقتين أو الثلاث

ولكن...مر خيالها أمامي للحظات

صوتها رن في أذني

ضحكتها..

حديثها..

كفى بالموت واعظا...

ألآن فقط...تذكرت هذه العباره..وكنت قد نسيتها

وتذكرت قول علي بن أبي طالب رضي الله عنه

" النفس تبكي على الدنيا وقد علمت

أن السلامة فيها ترك مافيها

لادار للمرء بعد الموت يسكنها

إلا التي كان قبل الموت يبنيها..."

ياربي ترحمها وتغفر لها ..وتصبر عيالها وأهلها

وتبدلها دارا خيرا من دارها

وأهلا خيرا من أهلها

اللهم أكرم نزلها ووسع مدخلها وإغسلها بالماء والثلج والبرد

ونقها من الخطايا كما ينقى الثوب الأبيض من الدنس

وعدت أسأل النفس...

ماذا أعددت لهذا اليوم..!!

سؤال ....

إجابته دائما...

دموع وإستغفار

رهبة وإنكسار

وطلب...من العزيز الغفار

أن يعاملني بما هو أهله

لا..بما أنا أهله

أسألكم الدعاء لجميع موتى المسلمين...

سبمبوت...والكراميل

 

 هل سمعتم صوت صمتي في الأيام الماضيه
أم أنكم إشتقتم سماع حروفي الخجله

-------
 قد استفزني الظلم أيما استفزاز...
فحبسته في صدري حتى كاد يخنقني
ولكني أثق بالله ...وبقدرته على إعادة الحق
فاستكانت نفسي...وهدأت
وها أنا أعود لكم
يامن تشتاق نفسي لقياكم
وأحب من كل قلبي أن أكون حيثما كنتم
:)


----------------------------

 

قبل جم يوم قريت بوست عند " سبمبوت "

وواااايد عجبني وكنت أبتسم وآنا أقراه

بعنوان كاراميل

وحبيت اني اعقب عليها في بوست يحكي قصه قالتها لي احدى العجائز

.....تقول الله يعطيها طولة العمر...:

كان ياماكان..في ايام قديمه من زمان
في خاله عندها كنتين..(زوجتين لإبناها)

وحده يابت 4بنات والثانيه 3 أولاد

طبعا الخاله في ذاك الوقت

(القصة كما قالت العجوز في ايام سنة البطاقه..يعني مابين 1935الى 1945..تقريبا)

تبي حق ولدها ..ولد

وكانت تحن على هالمسجينه..وهذي مابيدها شي كلشي بأمر الله سبحانه

بس وين اللي يفهم؟؟

عااااد قامت الخاله تعز ام الاولاد وتكرف ام البنات
ولي صار العصاري..
قالت :
يا أم فلان تعالي شربي معاي جاي العصر
وإنتي يا أم البنات قومي سويلنا جويهه نشربها
وقامت توصي ولدها بالزواج على المسيجينه
والحمد لله إن الولد كان راعي دين وصلاة ويخاف من الله
ومؤمن بأن الولد والبنت كلهم عطايا الرحمن
وقالت : إذا ما يابت لك ولد
لا تقعدون عندي...
وطلع سكن بره بيت أهله
وداااااارت الدنيا...
وكبروا العيال..

وأم الاولاد
فضى عليها البيت..إلا من مرور بعض أبنائها بين وقت ووقت
وخالتها عندها ساكنه..
وبيت أم البنات..مااااشاء الله
هذي داشه..مع ريلها وعيالها
وهذي طالعه..
والنسايب كل واحد يحشم عمه ويبر بعمته
وصاروا لهم مثل الأولاد وأعز
وفي يوم زارتهم الخاله..ونامت عندهم
وقامت تتحسر على حالة المسكينه الثانيه اللي قاعده وحيده
حتى جناينها ما سكنوا عندها..
والبيت فاضي عليهم أهما الثنتيين
وقالت لهم القعدة عندكم تونس وترد الروح
 اللي فهمتني إياه الحجيه الله يطول بعمرها
إن الولد يكبر ويروح
يمكن يرد مع مرته وعياله ويمكن تاخذه الدنيا


بس البنات يطلعون من بيت اهلهم وحيدات
ويردون له مع الريل والعيال..


وطبعا مادري اذا القصه صجيه أو قالتها من باب الحزايه


:)


يكفينا نحن أمهات البنات...
أن نقول للعالم أن عيسى إبن مريم
ولد للدنيا من أم بلا أب


وأن محمد بن عبدالله
صلى الله عليه وسلم
نبينا وحبيبنا وشفيعنا
ذريته في الدنيا باقيه... من فاطمه
إبنته...وبنيها هم خلفه وامتداده


أما آن لهذه النظرة أن تتغير؟؟؟


الحمد لله إن الحكومه مو عنصريه والا جان صار معاش الولد أكثر من البنت
؛)


ولهت عليكم...
:)

عساكم ولهتوا علي

مادري شقول؟؟؟

بصراحه....

لا احب الخوض بالسياسه علنا

ولا استطيع السكوت على مايحدث حولي..

وفقدت الروح اللتي اعتدت ان اكتب بها..

فكلما مسكت القلم.. او فتحت الجهاز..وجدتني اكتب ما لايقبل النشر

فامسح..

حاولت ان اكتب لكم عن حياتي كما عودتكم..فوجدتني اكتب لكم عن وطني ..واصدقاء وطني..

هل ابتعادنا عن ديننا..هو السبب؟؟

وأين نحن من مخافة الله..سبحانه

يارب اهدي بصيرتنا..لما فيه صلاحنا وصلاح امرنا وصلاح ديننا ودنيانا..

عذرا...

فالقلب حزين لما يحدث هنا وهناك..

ولانملك الا الدعاء لنا ولهم..

..حتى استعيد روحي واستجمع شتات افكاري...

سابقى منكم قريبه..

نداء...الى اهل التويتر



تويت....تويت

ردوا البيت

ترى مليت

يعني ماصارت والله..مي حاله معاكم

فقدنا البوستات الحلوه والحجي المصفف السنع

هناك اللهم ياكافي يالله ولبه الواحد يقوله حجوتين

انا جربته بس يومين وافتر راسي

يازييييين البلوق والله

:(

احنا عشقناها...وايد عشقناها



اكتب لكم ودموع عيني تهلي...

            على بلاد حبها ينعش الروح..

يادار ابوي ودار جدي وخلي...

            تفداج يا بلادي روح ورا روح..

************************

ياربي اسألك..تحفظ بلادي..وتحميها

لنا... ياكريم العطايا ..تخليها..

تبارك لنا بأرضها وسماها.. وكل من سكن فيها

*************************

قوم ياوطن ياحبيبي..وارفع الراس

حنا ذرى عينك في سود الليالي

اسمك على روس البلادين نوماس

ورسمك بوسط قلوبنا دوم غالي

*************************

مها كتبت..ولوكتبت بدمي بعد ياكويت

انتي بلادي وموطني وروحي بعد ياكويت

يادار ياللي ساكنينج دوووووووم احرار

ربي يعزج يابلد ويحميج بعد ياكويت

************************

دمتي بخير وسلامه ومن الرحمن محفوظه..يا أرض آبائي وأجدادي

من مات منهم بحرب الصريف ومن مات بحرب الجهرا..

ومنهم من بنى القصر الحمر..ومنهم من دخل غوص..واشتغل بالسفر

مخلوط دمي بين اهل شرق وجبله واهل القصر الحمر

وكلي فخر..ياكويت ..لاسمج انتسب

**********************

مشاعر ..كتبتها..لاتعبر عن كل ما يختلج نفسي الضعيفه..المغرمه..المملوءه بحب الكويت..واهل الكويت وتاريخ الكويت..وكل من يتنفس على ارضي الغاليه

أسأل الرحمن اللي عينه ماتنام..سبحانه خالق الاكوان

يحمي وطن عمري..ودار قلبي..وبيت روحي

والله يديم علينا نعمة الامان..في ظل شيوخنا الكرام

ويتمم علينا الافراح..ويرزقنا..السلام والخير

ربي..ياكريم..تحفظ بلادي

كان ودي احط كل الغناوي اللي من 79 الى 89  .. اللي عن الكويت

اللي فاضي..يقعد يسمعهم..ويبجي..مادري ليش ..بس انا لما اسمعهم اقعد ابجي

ادعوا الله يحفظ بلدنا ويحميها..ويبارك لنا فيها

وعليكم بالعافيه يا اهل الكويت الطيبين هالافراح

:)

إجازه

 

الوقت محاربني...

والساعه تعاندني...

دقايقها..منثره

ثوانيها..مبعثره

حتى عقاربها..صارت تحب الثرثره

وصارت تضايقني..

........

أبي أقعد فوق الغيم...

أو ...أركب فوق شجره..وأشوف الناس من بعيد بس مابي احد يلمحني...

يصير..إني أصير..طير صغير؟؟

بجناحين..ورديين..وأروح هناك..

وأنطر..ليييييين الهوى يردني

...........

ليش العين إذا ما دمعت تتعب...

وليش القلب..إذا ماشال هم الي لهم بالقلب كل الحب..بعد يتعب

أنا يمكن...تعب قلبي من همومي..

ولكن همكم دايم اذا شلته ...يريحني

...........

إجازه قصيره...

نعود بعدها بإذن الله أكثر حبا وودا..

نشحن بها القلوب بحب الله

ونملؤها لكم ودا خالصا لوجه الله...

كونوا بخير أنتم وقلوبكم....

..........

:)

صندوق الذكريات

صندوق ذكرياتي

أحب أنبش فيه بين وقت ..و..وقت

واتذكر..

صورة لمكان يذكرني بموقف

كلمة مكتوبة تذكرني بلحظات حلوة
كتاب اشوف فيه وجه لشخص ما...

ونوتات وااااايد...مكتوب فيها كل شي

ولما اقول كل شي اقصد كل شي...


؛)

صندوق مليئ بالايام واللحظات والمشاعر

مليئ بأشياء خارج نطاق التخزين والحفظ

ولكني احب احتفظ بكل شي يمثل بالنسبه لي ذكرى

مادري شلون فتحته..
وصار لي مدة طويله لاهيه عنه

ولقيت فيه اشياء عجيييبه

ناسيتها..

:)

اول شي.. لقيت نوته ترجع بالتاريخ الى شهر 5/1995

كنت اكتب فيها سوالفنا وحواراتنا
بيني انا ورفيجتي بالمحاضرات بدون ما نتكلم

علشان ما ننطرد او ننزف من الدكاترة..

واكتشفت اني حشاشه (نمامه) مو طبيعيه 

@@

بالبنات والاولاد اللي يقعدون معاي بالمحاضرة

فشششششللله....

كنت اكتب فيها كل اللي بقلبي

؛)

واااي ...شلون كنت سطحيه بالتفكير...

واعلق على هدوم البنت اللي جدامي وجوتيها اللي مو لايق معاها

وعلى ذاك الولد ليش مو لابس غترة وعقال ..

واقول حق رفيجتي..رايح الشاليه يمكن *-*

وغيرها ..مما لا يقال

؛)

..رفيجتي واهي تعبر عن قمة شعورها بالجوع

وعدم قدرتها على فهم الشرح لأنها تفكر بصمونة بطاط وفلافل مالت الكافتيريا

(عاد كافتيريا التجارة كانت حلوه..وونيسه..)

شلون كنت اتحلطم على الدكتور اللي حاضر على Wheelchair

بس علشان ما يغيب.. ويريحنا شويه من مادته القثيثه..(هذا يزاه الفقير)

حسيت اني كنت عبيطه وسخيفة...بعدين قلت لأ.. كنت صغيره..

والدنيا عندي ...على قدي..ما شفت من همومها شي..

بس ما قدرت اقطة..

لميته

وشميته..

وكل ورقة افتحها

اشوف فيها الدكاترة وقاعات المحاضرات

وبعض الوجوه اللي غابت عن عيوني..

صديقتي الحبيبه..تذكرين؟؟

وينج الحين وآنا وين...

الله يسامح هالدنيا شلون بعدتنا

الله...

ياحلو ذيج الايام..

والقلب لاهي..والدنيا بكبرها ما تهمني ولا افكر فيها...

اعيش اليوم بيومه..
كانت اقصى اهتماماتي

 باجر الصبح ليقمت ..شنو بلبس..

وشنو باكل ..ومتى برد البيت..

وعسى ما عندي تضارب بمواعيد الفاينل

هذي كانت اقصى اهتماماتي..

صج..كل وقت ما يستحي من وقته

وكل وقت وله أذان..

(مادري المثل راكب عالسالفة والا لأ )

كل مرة بطلع لي شي وبكتب لكم عنه

شرايكم؟؟

وبسميها سلسلة صندوق الذكريات

:)

يارب تكونون بخير وصحة وسعادة

حافظكم الرحمن

نحشة

محتاجة انحاش !!!

@@

إيي.. أنحااااش...

من كل شي

الدوام..البيت..التلفون..الاهل

بس 5ايام تكفيني..

اسوي حق قلبي وعقلي

recharge

وارجع لكم فرررررش

وابي ديرة مافيها تكنولوجيا

ولا تطور ..ويفضل محد يعرفها

يعني مابي فيها احد ينطق عربي

وحتى لو لغتهم غير معروفة بالنسبة لي هم ما عندي مانع

الله يعافي لغة الاشارة

يصير؟؟؟

اذا ماكو ارحب باقتراحات داخلية

يعني اذا في مكان بالكويت تنطبق عليه هالمواصفات

غير داري وبيتي طبعا ( لأن هذا الاقتراح اللي موصيني عليه)

بس ابي يكون فيه view حلو علشان النفسية

اقتراح اخير...

مايصير اروح امتحن عن اليهال لاني حفظت المناهج

:(((

آخر شي آخر شي

ليش التنزيلات شايشين هالايام

مايدرون عندنا امتحانات..

بوست تنفيسي..

يعني اقروا ولا تعلقون..

وبدون طنازة الله يعافيكم..

احساس يسكنني..

أحيانا ..بداية قومتي من فراشي تحسسني بيومي..

حلو ..خفيف..كئيب.. ثقيل..

واحيان اتغلب على احساس اللحظه اللي يحوشني بالتعوذ من الشيطان..

بس ان يومي يبدا يحلو..وينتصف بالحلاة وينتهي فيها .. 

ما املك بعده الا الحمد والشكر لله على ما عطاني ..

بداية يومي كانت مميزة..امتدادا لما انتهت به ليلتي..

 3 اتصالات صنعت لي لحظات جميلة  بهذا اليوم

كنت انتظر شيئا ما لمدة يومين تقريبا..

مترقبة ..للإتصال ..

أكثر من ترقبي ..لما يحملة المرسال

ومع انتهاء قضمتي الاخيرة لصمونة الافطار جائني اتصالها..

سعدت به..وانتابتني احاسيس لحظيه..تضحك..وتفشل

جني طالبة مدرسة..مداومة باول يوم دراسي

هذا كان اول احساس حسيته..

معرفتي ان في واقع حقيقي يعيش خلف الواقع الافتراضي اللي نحياه خلف تلك الصفحات الالكترونيه

هو ما جعلني اضحك من نفسي ومن خبطة البطن اللي حاشتني..

اول مرة تحاجين احد لاول مرة بتلفون..من غير ما تكونين شايفتة ..لأ !!

عيل اشفيج؟؟

الارتباط العاطفي ..يبدأ عادة بالنظر

الا انه في حالتي ابتدأ بالحرف والكلمة..

بالجملة..بالمشاعر..

بوااايد اشياء نحسها بدون ما نعرفها او نشوفها

او حتى نقدر نفسرها..

 الزين..مملوءة بالود أنا..

اتصال آخر..لكن من حبيبة الروح

أمي..عسى الله لايحرمني شوفتها..

" بنتغدا عندج..!! "

الساعة وحدة ونص الظهر وانا بالدوام

" يما شلون ما قلتوا مبجر ماسوينا شي يسوى .."

" لا تخافين ..دقيت على خدامتج الضحى وقلت لها شتسوي..!"

ابتسم..وارفع عيوني للسما..

يارب ..من غيرك بهذا الكرم..

احيانا اخاف من كثرة احاسيس الفرح بنفس اليوم واتمنى لو تكون موزعة على ايام..

بس الحمد لله.. الحافظ الله..وكل شي بامرة سبحانة

مساءا... اتصال آخر ..

من أغلى ..صديقة بالدنيا..

تبي تطلب حق بنتها rain boot

وتبيني اطلبه على صندوقي..لا وتبيه بسرعة

" ان شاااااااء الله حاضر "

" ويييييه يلا عاد لاتفلسفين علينا..تدرين فيني مالي مقاقة عالكمبيوتر.."

تامرين امر ..
احساسي باني اقدر اسوي شي يسعدها وتدعيلي عقبة جم دعوه حلوه..ما ينوصف

لكم ..
الله لايحرمني من سماع اصواتكم

وطقطقات اصابعكم على الكيبورد

ورسومات احرفكم على شاشات الكمبيتر

:)

* كنت ابي البوست بتاريخ 11/1/11

بس حسافة صارت الساعة 12 وانا للحين ما خلصت كتابة

عاد حسبولي اياة بدون تاخير..يصير!!

** بعد اذنكم التعليقات خليتهاmoderation

اجندتي



لم اعتد على تهنئة احد بالسنة الجديدة.. لعدة اسباب اهمها بالنسبة لي ..

على قولة عميمة.." كل ايام الله واحد.. مايفرق يوم عن يوم !! "

ولكن لا يمنع ان يكون لي بعض الاجراءات التي اتخذها قبل قدوم العام الجديد وهو اجراء وحيد للامانة.. شراء اجندة للعام المقبل قبل دخولة بايام قليلة ..

وبصراحة ادوخ .. حتى اجد لي اجندة مناسبة ..لاني متعودة اكتب مذكراتي من بداية مراهقتي يعني بديت من 20 سنة تقريبا ( لاتحسبووون عمري بلييييز ) وكنت استخدم النوتات الملونة واللي عليها رسومات واشكال...

وياسلام اذا كانت المذكرة من احدى سفراتي مع الاهل ...أوووووه أكشخ حدي وتصير الكتابة فيها غييير..

مع بداية التسعينات بدات استخدم اجندة الدكتور صالح العجيري ...

" الله يعطية الصحة والعافية وطولة العمر "..وطبعا جربت كل الاحجام والاشكال..

 واستخدمت في منتصف التسعينات اجندة كانت حلوة وتقسيمتها بعد غريبة وجديدة.. من تصميم الفنانة تهاني الايوب..او الايوبي ..ماني ذاكرة بالضبط.. بس ما استمرت واايد ..او يمكن انا ما لقيتها ..المهم.. وجربت اجندات متنوعة منها :

اجندة وزارة الدفاع ( هدية من قريب لي)

بيت التمويل ( دعاية ...)

البنك الوطني ( بعد دعاية ...)
حسين اليوسفي ( شارية منهم غسالة باناسونيك وعطوني الاجندة معاها)

طبعا الاجندات السابقة تندرج تحت مسمى " شي اببلاش ربحة بين "

ردينا على العجيري ( ما لنا عنه غناة ) مع اوائل الالفية .. والعام بس غيرت.. وما عجبتني المذكرة فرديت هالسنة مع اجندة العجيري.. ولسان حالي يقول :

" اللي ماله أول ماله تالي " و "عتيج الصوف ولا جديد البريسم "..

عادة كتابة المذكرات اليومية احيانا تسبب لي ارهاق فكري..وتدودهني..خصوصا اذا انشغلت يومين وما انتبهت اني ماكتبت بالمذكرة شي ...

عاد تعالي هني فججي مع الذاكرة وين رحت وشنو تغديت وشنو سويت وشنو كانت حالتي النفسية يومها وشنو كان اهم خبر في ذاك اليوم وشنو مواعيدي اللي خذيتها بذيج الحزه ... واااااي مخي بينبط !!!

اي شالله حادَج.. هذي حجوة أمي لي دقيت اسالها عن شي صار بنفس اليوم وانا ناسيتة..!!!

بس تصدقون خلاص ماني قادرة ابطل من هالطبع تعودت اني قبل لا انام اطل بمذكرتي وساعات اقلب الايام اللي فاتت واضحك عليها او يضيق خلقي منها...

لما اطالع اجنداتي القديمة..احس ان حياتي مكتوبة على ورق ..مخشوشه بين دفتي كتاب ... افكار..مواعيد..حسابات مالية.. و..عائلية.. مواليد.. وفيات... سفرات.. افراح .. احزان.. مشتريات..تحلطم (مو رفيجنا) ..مهمات....باختصار .. انا بدون رتوش

ساعات اقول لو اعطيها حق احد ما يعرفني ويقراها..شنو بيقول..ممكن يعرفني...
ممكن يحس بنفس الاحاسيس اللي كتبت فيها الكلمات بذيج الحزة والا صعبة؟؟؟

طبعا انا يتني عروض قوية جدا ومالية !! بس علشان اخليهم يقرون لو صفحة وحدة

بس انا موصيتهم وصية .. محد يقرا مذكراتي الا بعد وفاتي .. ( يعني منهم)

( قولوا بعد عمر طويل ان شاء الله )

:)

يارب تكونون باحسن حال..

والله يبارك لي ولكم بكل اوقاتنا ..