لاتلوموني...بالكانيالوني

جان زين تجربونها
الأكلة هذي....تعذبني ) :

طبعا لازم أسويها مرة بالأسبوع

بس طعمها أحلى من مالت بيتزا إكسبرس

وبصراحة كل مرة اسويها أكتشف اني اقدر اضيف

عليها اضافات وتطلع بعد احلى

يالله نبدي الشغل

===

المقادير

علبة كانيالوني

سبانخ مثلجة

مشروم

بصل مفروم

جبنة ريكوتا او فيتا او جبنة يونانية المتوفر

صلصة بريقو للباستا

بشمل

وبس...قلت لكم سهلة

شلون نسويها؟؟؟؟؟

أول شي أبي اوريكم شكل علبة الكانيالوني اللي افضلها

أول شي نحمس البصل مع السبانخ

ونضيف عليهم البهارات

ونتركة على كتر

بعدين نحمس البصل مع المشروم

ونضيف عليهم شوية بهارات وملح قليل

ونتركة بعد لين يفتر شوية

بعدين نخلطهم مع بعض في بايركس

ونضيف عليهم الجبن ونهرسة معاهم بالشوكة

ونخلطهم عدل

وجذية يصير شكلهم

بعدين نحضر بايركس او اي ماعون يدش الفرن وشكلة حلو

بس لازم يكون غزير شوية

ونصب فية 1/2 غرشة الصلصة تقريبا

لحد مايغطي القاعة

بعدين ناخذ الكانيالوني ونحشية بالخلطة بس مانترسة لين يفيض

يعني 3/4 

وراح يكون بهالشكل

 ونصفة بالماعون

 

ولما يخلص نصب فوقة الباشميل

طبعا محد مايعرف يسويها

بس خلوها خفيفة شوية احسن لان احنا مانبي فوق طبقة يابسة

ونرش جبن الموزاريلا وشوية بارميزان مبشور

 

اكو بعد خلطة بالجمعيات دائما استخدمها حق الباستا

ارش منها شوية فوق

والحين.....

نشوف الطبق شلون طلع

جان زين اقدر اشممكم الريحة

عليكم بالعافية مقدما

(لاتشوفون خدامتي شلون تخزني وانا اصور)

أبشركم...النتايج عال العال

 الحمد لله الذي بنعمتة تتم الصالحات
 ياربي لك الحمد ما خيبت رجاي واملي
 ونجحوا بناتي بتفوق
 وفرحوا قلبي وقلب ابوهم
 والله يتمم علينا اللحظات السعيدة
 احنا وكل المسلمين
 يارب توفق طلاب الثانوية
 ولا تخيب تعبهم
 .
 .
 والحين باذن الله
 بتفرغ حق المدونة
 عاد خلاص ماكو شي ان شاء الله بيشغلني عنكم ياحلويييييين

  دمتم بحب وسعادة
 وعطلة سعيدة على قلوبكم الطيبة

ربي اغفر لي

"دنيا تضيق وفزعة الله قريبه

وعند الفرج مايخذ الضيق ساعة ...."


سبحان الله...
نلجأ الى المخلوق
... وننسى الخالق


سبحان الله...
نخشى الملوك
.... وننسى مالك الملك


سبحان الله...
نطلب رضى العباد
... وننسى رب العباد


سبحان الله...
نسأل من لا يعطي
...وننسى خير من يعطي

 

أيا نفس توبي

وقري بالذنوبي

مالك الا الله

رب الاربابي

اللهم اغفر لي ولوالدي

وارحم كل من له حق علي

وتقبل توبتي وارضى عني

وبارك لي في ذريتي
وفي وقتي

ولاتسلط علي بذنوبي

من لايخافك فيني ولا يرحمني

وينج يا مي ...المطعم فتح

هذا البوست اهداااااء للعزيزة

مي

عاد هالله الله بالتطبيق السنع

وعلى فكرة

مايدورعندي شي للرجيم كلللللش

أول طبق

انا اعتبرة من المقبلات

بطاط بالمشروم والكريمة

بالفرن

المقادير:

شرائح بطاط دائرية رقيقة

علبة مشروم كبيرة مقطعه شرائح

بصلة صغيرة مقطعة شرائح

بهارات مشكلة( انا افضل الكاري العلبة الخضراء اللي بالجمعيات)

بقسماط

علبة دمار شامل قصدي كريمة (؛

جبن موزاريلا او شيدر عادي ما تفرق المهم شي يتمقط فوق

الطريقة :

ماقدر اقول سمعيني ....شوووفيني عدل

1-ييبي ماعون بايركس او فخار المهم شي حلو لان راح يتقدم بالماعون

رشي بالقاعة بقسماط لين اتغطى بس مو يصير طبقة متينة

2-بعدين صفي شرايح البطاط بالتساوي

عاد يطلع دور...دورين... عادي بس مو اكثر عشان يمدية ينظى بالفرن

الحين...

3-ييبي طابي (مقلاة) غزيرة شوية وحمسي البصل

زيدي علية ماجي (اي نسيت نحتاج مكعب واحد)

انا ساعات ما احطة ما يفرق وايد الطعم

بس بالماجي انطع

4-حمسية وقبل لايذبل حطي علية المشروم

...اذا فرش حطية على طول

...اذا علبة غسلي قبل وقطعية شرائح بعد

وبعدين ضيفي البهارات

لما ريحتة تكفخ في راسج يعني استوى

طفي الجولة لاتحترقين

وشبي الفرن لاتنسين ...(:

5-بعدين حطية على البطاط

وبس يفتر شوية صبي علبة الدمار الشامل( الكريمة)

( واذا ما يمديج حطية على طول وما ياج علي)

6-ورشي فوقها الجبن وجنج ماتدرين شوية بقسماط بعد

 غطيه بالقصديرودخليه الفرن

وماتاخذ وقت بس لين يلين البطاط لان كل شي ناضي

وحمشيها شوية من فوق

ترى سهلة بس انا قرقتي وااايدة

وبالعافية على ألبك

عاد علميني شيصير وياج

تحياتي

بيني وبينج...

....اذا الله سهل

....اذا الله سهل

لج مني كل اسبوع بوست او اثنين من هالنوع

شدعوة ياحافظ....أبي التاج

ترى انا زعلانة وااااايد
 ):

ومبوزه  جدا جدا جدا

.

.

إحولت عيوني وانا اشوف التاج من دار لي دار

وانا يا خلاَف لي الله

ليش ... عشان اصغر وحدة حاقريني

صج عمري التدويني بس.....

 3 شهور

بس والله جنة صار لي عمر معاكم (:

.

.

عاد اخيتكم ماخلت في خاطرها

والله بسوية وما علي من احد

انا احولة حق روحي
شبيصير يعني

***********

قوانين التاج السلطاني

***********

 

اذكر اسم من طلب منك حل هذا الواجب

~( آآآآآآآنا)~

تحدث عن ستة أسرار قد لا يكتشفها من يقابلك للمرة الأولى

إحم إحم

نبدي بسم الله

1-  ولله الحمد قولوا ماشاء الله أطبخ مثل المطاعم

وطباخي وايد حلو وفنانة بكل شي واللي يشوفني اول مرة ما يصدق

كلة يقولون شكلج مايوحي انج تدشين المطبخ

2- أخاااااف حدي من الزهيويه (((فوبيا)))

لدرجة اني مرة من المرات كنت حامل بالشهر الثامن

ومن القثى فارشة بالحوش وشهر 5

جان يمشي علي ذاك ال....

شقول بس استغفر الله

وطمرت طمرة من الحوش لي باب المدخل 5امتار تقريبا

وريلي اخترع وعيالي حسبالهم بولد...ههههه

3- فيني طبع شين

يبين على ويهي اذا مو عاجبني اللي جدامي

ساعات افتشل من عمري اذا حسوا فيني

4-هم فيني طبع شين ثاني

(( ياساتر كلج اطباع شينة))

بس هذا مودرني كلش

ما انسى الاساءة ابد

اتناساها
لكن مااقدر انساها

وتاثر على علاقاتي بالاشخاص

بس ها.....

اذا الشخص عزيز واااايد

وفري سبشل

لألأ الوضع يتغير وتنمحي كلش ملش

5- وايد دقيقة على كل شي

واحاسب حتى بالكلمة

الله يعين ريلي وعيالي والخدم

بس هالشي عاجب مديرتي بالدوام وكلة تمدحني
(( ....هذا اهم شي P: ))

6-بسرعة اعصب
وبسرعة الغلط يثيرني
لدرجة اني احيانا اعطي احكام واتصرف على اساس اللحظة
وعقب السكرة تييي الفكرة
عاااااد اتحسف اذا قايلة شي مو حلو
(بس ما اغلط لألألألأ)
وتلقوني اتعذر بس بطريقة غبر مباشرة
واليوم اللي اريق فية كل الادارة
يعني متحسفة على شي سويتة


*********
الحمد لله
بررررردت  قلبي
********

 

حول هذا الواجب إلى ستة مدونين، واذكر أسماءهم مع روابط مدوناتهم في موضوعك

اترك تعليقا في مدونة من حولت الواجب إليهم، ليعلموا عن هذا الواجب

ماشاء الله الكل مسوية

اتمنى تتقبلون مني خفة دمي
اسم الله عليييييييي
وااااااي
لحد ينظلني

تحياتي للكل

أشكو إليك

قصدَت باب الرجا والناس قد رقدوا

وبُت أشكوا إلى مولاي ما أجد

 

وقلت يا أملي في كل نائبة

يا من إليه لكشف الضر اعتمد

 

اشكوا إليك أمورا أنت تعلمها

مالي على حملها صبرا ولاجلد

 

 

وقد بسطت يدي بالذل مفتقرا

اليك ياخير من مدت اليه يد

 

 

فلا تردنها يارب خائبة

فبحر جودك يروي كل من يرد

 

 

يارب هيئ لنا من امرنا رشدا

واجعل معونتك العظمى لنا سندا

 

و لا تكلنا إلى تدبير أنفسنا

فالعبد يعجز عن إصلاح ما فسدا

أنت العليم وقد وجهت يا أملي

إلى رجائك وجها سائلا ويدا

 

و للرجاء ثواب أنت تعلمه

فاجعل ثوابي دوام الستر لي أبدا

وصلى ربي على المختار من مضر

و الآل و الصحب والاتباع والشهدا

*******

منقول

*******

عطلة سعيدة وحلوة وكلها حب وأمل

اتمناها لكم بإذن الله

حجاب فاشون...@@

   بصراحة ما بلعتها
 .
 .
 .
  أمس كنت طالعة العصاري بروحي وافتريت عشرين مشوار
 ((( دشي بالموضوع)))

 (:

 مريت مركز سلطان حولي اليديد اللي يم نادي القادسية
 .
 .
 (((للحين ماله علاقة )))

 ( ؛

  سوري قاعدة اكلم نفسي
  الحين الحين

  شفت مجلة هذا غلافها

  اللي فوق بس كلش مابلعتها
  يعني شنو مجلة حق الحجاب
  اللي اعرفة الحجاب حجاب مالة موضة
  بعد هذا شي يديد
  يوم نبشت فيها والا الحلوين المصريين بتوع كلة
  اهما اللي مسوينها
  ليش يعني
  لوتشوفون الازياء كلها نفس الغلاف
  حجاب بو رقبة انا اسمية
  يعني اتحجب واطلع رقبتي ليش
  يعني اتحجب واطلع تراجيي ليش
  انا اشوف السفوووور اللي مو متحجبة وايد اهون
  من حجاب العازة على قولة امي
  والله ....شنو .... حدة مليق ...حتى مافية ذوق
  يضحك والله العظيم
  عذروني بس لازم اعلق ماقدر
 .
 .
 .
  لحد يزعل عفية

يا سرايين....ياظلمة

ياغاطة شهر ونص ...يابوستين ورى بعض ... الله يعينكم
**********

ومضة صغيرة

بعد قلبي كل الأمهات
هالقلب اللي عندهم شنو...
تحاتي العازب والمتزوج
واللي يشتغل واللي ينطر الوظيفة
وعيال هذا وعيال هذي
وحتى الخدامات يشكون عليها همومهم وتسمع وتنصح ...
الله لا يبين غلاتج يا شمعة البيت
ويمد بعمرج ويرزقج الصحة والعافية
وماأدش البيت وانتي مو فية يايمه

************

صار لي فترة قايلة بخفف
يعني بسوي رجييم صحي مو قاسي
ومن قلت وآنا ما أطالع إلا محطة فتافيت
جنة عناد حق عمري ):
لا وخالتي تسميها نقوص مو فتافيت ههههههه

**********

صج إن الاوليين ماخلو للتالين شي
مو قالو لسانك حصانك ان صنتة صانك وان هنتة هانك
عاد آنا تغشمرت مع المديرة .... ادري قوية
بس بنت الحلال ظليمتها شينة
تقبلت الموضوع ومشتة
بس يبين بالتقوييم الياي
تدرون شصار
قالت: برد قصروا التكييف
جان اتليييقف
واقول: هذي مواري الكبر
هههههههه
ماشفتوا ويهها شلون قلب
عاد مابيني وبينها الا خمس سنين
بس تفرق ( ;

********

سألتني احداهم يوما؟؟؟؟
ايهما اهم بين الزوجين:
الحب.... والا.... الحشيمة
قالت ....
يعني مثلا احنا نحب بعض وايد
بس ماكو احترام ذاك الزود ومافية حشيمة
يعني عادي اطلع معاة ويخز البنات
عادي يزفني بالجمعية جدام الكاشيير اذا الفاتورة اكثر من الفلوس اللي معاة
عادي يقوللي دفعي حساب المطعم مو انتي اللي تحنيين عالطلعة
بس اقولكم يحبني وايد واحبة ....@@
هاي شلون ترهم!!!
انا من وجهة نظري احب رياييييل قبل
اللي لهم هيبة وقلب حنون
سخي ...يحشم ...يحتوي المراة
ويصيير لها الاب والاخ والريل
وماتهاب معاه من يووووور الزمن بس .

**********

الى كل قلب لا يحمل في طياتة ذرة من الكراهية او الحقد او الحسد
هنيئا لك .... وتبا لقلبي
فهو لا ينسى الاساءة مهما مر الزمن

*******

عطلة سعيدة على قلوبكم

الله ياخذ الواسطة

أكره كل انسان ياخذ شي مو من حقة ....ومن حق غيره.... بالواسطة
ليش يعني كل شي بالهالبلد صار لازم واسطة
الطبيب لازم تعرف احد عشان يمشيك والا انطر لما المصري يدخل المصرية والفلبيني يدخل الفلبينية والهندي يدخل الهندية وووووو
المدرسة اذا تعرفين فيها ابلة اوووووه امور عيالج ماشية واذا الوكيلة او الناظرة بعد لايداومون احسن
الجمعية يوزعون الهدايا على المساهمين اللي يعرفونهم والباجي تعال انت دور وبحث واسال عشن تعرف اذا في مناسبة فيها توزيع هدايا والا نام واشبع نوم
الوظيفة تبي واسطة
حتى المواقف في الوزارات مو كل الموظفين يحصلون كروت حق المواقف واذا سالت قالك ماتكفي انزين ليش على ناس وناس
حتى الفراش اللي عندي بالدوام يبيني امشي معاملة الهندي اللي من طرفة بسرعة اقولة تمشي بالدور يقولي: ماما هذا صديق مال انا ما يبي ينطر وايد
الله يصبرني
مشكلتي احب العدل في كل شي
مو يقولون العدل اساس الحكم
ليش ..لهالدرجة العدل صعب
والمساواة مو حلوة
الله يهديكم بس

شنو هدفك بالحياة

...وايد استفيد من حضور دورات او برامج تدريبية

ذات الطابع الاجتماعي والعملي

واللي تكون واقعية وتفيدني بالحياة العامة

يعني كنت في مرة ماخذة دورة اسمها

" نجاحك هدف "

وكان المحاضر

د.فهد البريكان

وبصراحة كان الدكتور وايد حبوب وطيب وفاهم 

بصراحة كان اسبوع خيالي

اولا تغيير عن روتيين الدوام

ثانيا المجموعة كانت متجانسة والخبرات متنوعة

يعني كل واحد/ وحدة فينا من جهة عمل غير

وبعدين خلوني اقول لكم شي وايد مهم

لما تكون في مكان محد يعرفك فية معرفة شخصية

على مستوى العمل والحياة العامة

صدقوني راح تاخذون راحتكم بالكلام

وتشوفون ان انتوا اندمجتوا بسرعة

وانطلقتوا بالحجي وقعدتوا تفرغون

كل الضغوطات اللي فيكم

وبعدين يعتمد على المحاضر

وكل كلمة انقالت انا شخصيا استفدت منها

لانها تجارب في الحياة

مو بس كلام على ورق مثل ما يقولون

واهم شي اني يبت لي نوتة وقعدت اسجل فيها

 كل فكرة تخطر على بالي

حسيت اني ابي انجز شي وابي احقق اهداف وايد

وماراح اقول ما عندي وقت خلالالالالالالاص

لأن الوقت موجود بس احنا ما نعرف نديرة

او نستغلة صح

احيانا تكون بحاجة لاستشارة

او نصيحة بس ماتعرف من تسال

او تسأل شخص ومايفيدك

و يمكن يضرك باقتراحة بعد

 طبعا اسمى هدف

الواحد لازم يحطة امام عينة ويعمل لة

بكل جهد واخلاص هو رضا الله

ثم رضا الواالدين

وعقبها حط لك الاهداف اللي تبي

من هدف بو يوم الى هدف بو20سنة

ولاتخلي احد يقولك ماتقدر

ترى ماكو احد مايقدر

نبش داخلك راح تتفاجأ من الشخصية اللي فيك

وانت داقرها!!!

شجع روحك ودللها وكافئها على اي انجاز

وشوفوا الفرق

راح تتغير حياتكم

مثل ماتغيرت حياتي للافضل باذن الله

اتمنى الكل يحقق احلامة واهدافة

وتاكدوا ان اللي وصلوا مو احسن منا

يوم في حياتي

الى كل القلوب التي احب


الى كل الارواح التي اعشق


احبكم...


تلفني بين فترة واخرى ومضات


و..افكار..تنبئ بالفراق.. الابدي


فأفزع... تخيفني الفكرة


ولا يبعدها عني الا الاستغفار


والتعوذ من الشيطان


ولكن ....


كيف لم اهيئ نفسي لهذا


الا اعلم اني ساموت يوما ما


وسافارق الاحباب والابناء والاصحاب


ساموت... وكل نفس ذائقة الموت


متى ... الله اعلم..


تتشتت الافكار وتضيع مني الكلمات


ولا اعرف ...هل حينها ساودع الاحباب


هل سيكون الوداع باستطاعتي


يارب ...
يامقلب القلوب ثبت قلبي على دينك
*****




المـوت هيـن البـلا وش ورا المـوت
........عنـد الحسـاب يهـون سهـم المنايـا

باكر نمـوت وتصبـح قبورنـا بيـوت
...........وعقـب القصـور بضيقـات الزوايـا

 في جوف الارض وكل من حولك سكوت
.............وتعاقبـن بالقـبـر عــوج الحنـايـا


يـارب يامنجـي نبيـك مـن المـوت
............سترك وعفـوك يـوم كشـف الخفايـا


باكر اليا جينـا علـى داعـي الصـوت
.............شيبـان واطفـال وشبـاب وصبـايـا


ندعـي وحنـا بيـن باكـي ومبهـوت
...............ورحنـا لهـا ننقـاد مـثـل السبـايـا


يـارب تهدينـي قبـل لحظـة الفـوت
...............وتغفـر ذنوبـي ياكـريـم العطـايـا


اشكيـك هـم داخـل الصـدر مكبـوت
.................وأيامـي الــي بالخطـايـا مـلايـا


أن لاذ بك من كـان طايـع ومبخـوت
..............فـي مـن يلـوذ المرتكـب للخطـايـا


يـارب ياقـادر علـى كـل طاغـوت
...............لا ياقـف اللـي وحـدوبـك خـزايـا


رحماك لامنـا صحينـا مـن المـوت
.................واليـا وقفنـا عنـد بـابـك عـرايا

زيارة مريض

اللهم رب الناس

اذهب الباس

واشف انت الشافي

لاشفاء الا شفاؤك

شفاء لايغادرسقما

****

جم واحد فينا راح زيارة لمريض بالمستشفى

وايد

وجم واحد فينا راح لزيارة مريض بالبيت

هم...وايد

بس كل مرة نروح فيها للمرضى ناخذ معانا

 ورود

او كاكاو

او هدايا منوعة

بس اعتقد قلة هم اللي ياخذون

كتاب للرقية الشرعية

ويستغلون زيارتهم للمريض بقراءة

الادعية له ورقيتة

وتصدقون هالشي انا لاحظت

انه يونس المريض

ويحسسة بالراحة

يعني جرب تزور مريض

وتسلم علية وتحبة

وتحط ايدك على راسة وتقول:

اسأل الله العظيم رب العرش العظيم ان يشفيك

شوفوا ردة الفعل شلون تصير

ادري ...

في ناس راح تستنكر هالحركة

ويمكن تنظر لج ولك

بنظرة كلش ماتسوى عليك

بس طبعا مو مع الكل نسوي جذي

لكن جربوا حاولوا وقبل كل شي

جسوا نبض المريض

يعني اذا كان توه صاحي من البنج لألألأ

اخاف يتهور ويكفخك باكبر ما عنده

ترى الاجر من زيارة المريض عظيم

والله لايحرمني وياكم الأجر

ويبعد عنا وعنكم وكل حبايبنا

المرض والبلاء

ويرزقنا وياكم الصحة والعافية

" يارب تشفي أمي وتكشف ضرها"

دمتم بحفظ الله

هالعطلة....زحمة

صباح الخير

توني قاعدة من النوم تقريبا الساعة 9 وطبعا طول الليل ما نمت عدل

بنتي الصغيرة نايمة معاي بالفراش وترفسني وتتحلطم ليدزيتها عني

وبنتي الثانية...

تبي تروح المدرسة عندهم تدريب حق حفلة الشيخ اللي بقصر بيان

وتعالي قومي بدلي ووديها وردي بعدين اخذيها

والخدامات ... بروحهم فلم ثاني...

اللي ناطرتني بورقة هالطول فيها اغراض الجمعية

والثانية تبي كرت تدق على اهلها وتبي شباصة (اي شباااااصة)

والعصر عندي استقبال ولادة

وامس بعد من الصبح قعدت وديت بنتي المدرسة عشان التدريب

بعدين الظهر يبتها ورحت بيتنا واليمعه مافيها راحة طبعا

ورديت بالليل اطق روس بالسيارة اللي ساعات احس انها تدل الطريج بروحها

لاني كنت شبه نايمة ناهيكم عن

(حلوة ناهيكم يعني عندي حصيلة لغوية)

نجرة اليهال بالسيارة منو يقعد جدام ومنو كان دورة اول امس قعد جدام

ومنو يقعد ورى بروحة بدون الخدم

ومنو يبي يشغل اناشيد العفاسي

ومنو يبي مارينا اف ام

.....وانا ابي افج الدريشة واصرخ..

طبعا البابا هالويك اند قايل يبي يروح البر مع ربعة بس يوم

ومددها لغاية اليوم من يوم الخميس

...يلا..علية بالعافية

آآآآآآآآآآآآآآآآه... شفتو شلون عطلتي كانت زحمة ...

اوووه نسيت يوم الخميس ترى كان بعد زوارة بيت يدتي

وعندي لكم سوالف عجيبة من هاليمعه بس بخليها في بوست بروحها

والله تعبت ......الشكوى لله...

ساعات ابي اغمض عيوني وارد افتحها

القى نفسي بمكان مافيه احد بس انا لاتلفون ولالابتوب ولا تلفزيون

تدرون شنو ابي

ليوان.... والحزة فجر

والنور..طالع مستحي

والطير..ناطرني امر

شايل على جناحة حجي

يازين..ايام الصغر

والقلب..فاضي ومهتني

اخليكم بحفظ الله

أولى سالفاتي

....من يذكر قعدات اللواوين وقت العصاري او حتى مسيان ...

ترى انا مو عودة وايد بس عمرى ما نسيت ايام اول ..والحين حسيت بكلام امهاتنا

لما يقولون ايامنا احلى من ايامكم ترى صاجين ...يمكن مو وايد بس والله كانت

ايام حلوة..يعني انا كنت احب ادرس واكتب واجباتي بالليوان

احب اتعشى بالليوان

ساعات احب انام العصر اذا الجو حلو بالليوان

احيانا اذا كان في مسايير عند يدتي والجو ربيعي والهوى نسناس كانت

تقعد معاهم بالليوان وانا طبعا @@باقة العيون واتسمع

سوالف عجيبة بعضها حلو وبعضها يخرع ويقث

بس كانوا يسولفون ويشربون الجاي ويتقرضون بالحب والمكسرات

وانا مازلت @@باقة العين واتسمع

وياما لعبت وانخشيت عن اخواني ورى المندة(عامود طويل يسند بنيان البيت ويكون خارج بناء الغرف)

بس اللي ابي اقوله ان قعدة الليوان دايما تكون بدون تكلف

طبيعية دافية وفيها الفة وحنان

والواحد فيها يقعد على راحتة ما يحاتي

مادري ليش هذا شعوري لما اتذكر بيوت اول والحوش العربي واللواوين

المهم....ما ابي اطول عليكم من اول مرة

@@(كل هذا ما طولت)

بس اتمنى تكون سوالفنا على طول خفيفة وعالبساطة

واهم شي مانجرح باحد ولانخربط وايد

واللهم احفظ لنا هذا البلد المعطاء

امييييين

دمتم بحفظ الله