....من يذكر قعدات اللواوين وقت العصاري او حتى مسيان ...ترى انا مو عودة وايد بس عمرى ما نسيت ايام اول ..والحين حسيت بكلام امهاتنا
لما يقولون ايامنا احلى من ايامكم ترى صاجين ...يمكن مو وايد بس والله كانت
ايام حلوة..يعني انا كنت احب ادرس واكتب واجباتي بالليوان
احب اتعشى بالليوان
ساعات احب انام العصر اذا الجو حلو بالليوان
احيانا اذا كان في مسايير عند يدتي والجو ربيعي والهوى نسناس كانت
تقعد معاهم بالليوان وانا طبعا @@باقة العيون واتسمع
سوالف عجيبة بعضها حلو وبعضها يخرع ويقث
بس كانوا يسولفون ويشربون الجاي ويتقرضون بالحب والمكسرات
وانا مازلت @@باقة العين واتسمع
وياما لعبت وانخشيت عن اخواني ورى المندة(عامود طويل يسند بنيان البيت ويكون خارج بناء الغرف)
بس اللي ابي اقوله ان قعدة الليوان دايما تكون بدون تكلف
طبيعية دافية وفيها الفة وحنان
والواحد فيها يقعد على راحتة ما يحاتي
مادري ليش هذا شعوري لما اتذكر بيوت اول والحوش العربي واللواوين
المهم....ما ابي اطول عليكم من اول مرة
@@(كل هذا ما طولت)
بس اتمنى تكون سوالفنا على طول خفيفة وعالبساطة
واهم شي مانجرح باحد ولانخربط وايد
واللهم احفظ لنا هذا البلد المعطاء
امييييين
دمتم بحفظ الله
هناك 6 تعليقات:
امييين
وحياج الله بعالم البلوقات :>
ناطرين جديدج
بداية اسعدني تعليقج عندي لأول مره
مع ان عندي احساس انج متابعتني صار لج مده
اللوك مال المونه شررررح وراقي وبسيط
ويعطيني انعكاس عن شخصية صاحبته
:)
اسم المدونه ييه على هواي
حبيته حبيته حبيته
الحين ييه وقت الجد
انتقي ما تكتبينه
اختاري مفرداتج وارتقي فيها
ابتعدي عن الإطاله لأنها ساعات تملل
مو مهم تنشرين كل يومين
المهم المواضيع اللي تكتبينها تكون تستاهل المتابعه
وكوني نفسج ... صحيح احنا منخشين ورى شاشه
بس الإنسان المتكلف واللي يمثل يبين ترى
اتمنى لج التوفيق
وبداية طيبه
واكييييد بكون من المشجعات
بس هم لا تأمنين نقدي
ترى انا صريحه وما اجامل
لسبب واحد
اللي يهموني احب اكون صادقه ونصوحه معاهم
:)
كل الحب والتوفيق عزيزتي
انا كنت رغم صغر سني انام فوق السطح في بيت يدي الي كان صعب عليه انه يهدم البيت الطين ويبني بيت ما تعب عليه ولا حط ايده فيه كنا نهوهي من ليوان لي ليوان من بنقله لي بنقله عاد توفى اليد رحمة الله عليه والورثه باعو البيت خوفا من الاحفاد تصير بينهم مشاكل يعني بيناتنا احنا لكن الطين وازالوه وازالو معاه كل ما كان يربطنا بذاك الليوان والحوش والجليب وغيره من امور كانت موجوده امامنا لتختفي وتبقى صوره في الاذهان بلا رائحه او طعم او احساس
عزيزتي بنت الديرة
حياج الله وهذي الساعة المباركة
وباذن الله اكون من الناس اللي تحرصون على متابعتها ويزاج الله خير
تحياتي
الزين....الزين....الزين
بقولج سر
( ترى انتي من الاوائل اللي قريت لهم بالمدونات وانتي سبب تشجيعي على الكتابة)
حبيبتي كلامج وايد شجعني ....وخوفني
تدرين ليش؟؟
لان انا فعلا ابي اكتب عن وايد اشياء تمر علي بالحياة واحب اشارك فيها ناس مااعرفهم ..(فهمتي قصدي)..
بس بنفس الوقت ماحب اكتب خرابيط وحجي فاضي بس عشان الكتابة لألأ كلش مو انا؛)
بعدين تدرين عندي هواية كتابة المذكرات من يوم انا بالثانوية للحين وانا ام عيال....ها
انا ابيج تنتقدين (رحم الله امرئ اهدى الي عيوبي )
وصدقيني مرورج لي اسعدني وااااااايد
واحساسج بمكانة انا متابعتج من زماااان بس ما سجلت الا توني عشان جذي ما يطلع اسمي
تحياتي لج وشكري
عزيزي جبريت
حياك الله...تصدق كلامك يه عالوتر
لان احنا بعد هدموا بيتنا القديم وبنوا بداله بيت بدون لون ولا طعم ولا احساس والله ياخوي انك صاج
تصدق حتى يدتي المسكينة من سكنت هالبيت واهي مريضة سبحان الله... الناس ساعات تتعلق بالمكان اكثر من الاشخاص
انا حتى سدرة الكنار للحين اتخيل اني اشم ريحتها
مرة ثانية اقولك حياك الله
إرسال تعليق