هذا البوست اهداااااء للعزيزة
مي
عاد هالله الله بالتطبيق السنع
وعلى فكرة
مايدورعندي شي للرجيم كلللللش
أول طبق
انا اعتبرة من المقبلات
بطاط بالمشروم والكريمة
بالفرن
المقادير:
شرائح بطاط دائرية رقيقة
علبة مشروم كبيرة مقطعه شرائح
بصلة صغيرة مقطعة شرائح
بهارات مشكلة( انا افضل الكاري العلبة الخضراء اللي بالجمعيات)
بقسماط
علبة دمار شامل قصدي كريمة (؛
جبن موزاريلا او شيدر عادي ما تفرق المهم شي يتمقط فوق
الطريقة :
ماقدر اقول سمعيني ....شوووفيني عدل
1-ييبي ماعون بايركس او فخار المهم شي حلو لان راح يتقدم بالماعون
رشي بالقاعة بقسماط لين اتغطى بس مو يصير طبقة متينة
2-بعدين صفي شرايح البطاط بالتساوي
عاد يطلع دور...دورين... عادي بس مو اكثر عشان يمدية ينظى بالفرن
الحين...
3-ييبي طابي (مقلاة) غزيرة شوية وحمسي البصل
زيدي علية ماجي (اي نسيت نحتاج مكعب واحد)
انا ساعات ما احطة ما يفرق وايد الطعم
بس بالماجي انطع
4-حمسية وقبل لايذبل حطي علية المشروم
...اذا فرش حطية على طول
...اذا علبة غسلي قبل وقطعية شرائح بعد
وبعدين ضيفي البهارات
لما ريحتة تكفخ في راسج يعني استوى
طفي الجولة لاتحترقين
وشبي الفرن لاتنسين ...(:
5-بعدين حطية على البطاط
وبس يفتر شوية صبي علبة الدمار الشامل( الكريمة)
( واذا ما يمديج حطية على طول وما ياج علي)
6-ورشي فوقها الجبن وجنج ماتدرين شوية بقسماط بعد
غطيه بالقصديرودخليه الفرن
وماتاخذ وقت بس لين يلين البطاط لان كل شي ناضي
وحمشيها شوية من فوق
ترى سهلة بس انا قرقتي وااايدة
وبالعافية على ألبك
عاد علميني شيصير وياج
تحياتي
بيني وبينج...
....اذا الله سهل
....اذا الله سهل
لج مني كل اسبوع بوست او اثنين من هالنوع
هناك تعليقان (2):
يا بعد عمري يالليوان ،، والله أحرجتيني بذوقج ،،
مبين عليج لج مزاااج بالطبخ اللهم بارك..
وضحكتيني من قلب على الدمار الشامل
والطبق شكله يشوق بصراحة ومقاديره سهله ومتوفرة..
ان شاء الله أسويه باجر حق زوارتنا وأرد لج الأخبار..
تدرين عاد اختي دقت علي قالت لا تيبين حلو :/
توهقت ! ماعندي غير فتتة بيديان أو ورقت عنب !
الحين بفاجأهم لما أسوي لهم هالطبق ..
^_^
تسلمين يا عسل
كلج ذوق
حبيبتي مي
الله يسلم عمرج يالحلوة
بنطر الاخبار
وأفا عليج والله ماسويت شي
الناس للناس والكل بالله
سلمي على زوارتكم (:
إرسال تعليق