ما زال رقمك في نقالي....

لحظة .. بين الشعور واللا شعور 
 تاخذني الي ازرار هاتفي النقال
واعبث بازرار الcontacts
انزل الاسماء بحثا عن رقم ما
ربما...
لصديقة
او قريبة
او حتى لمدرس خصوصي
او صباغ
.
.
فاقف للحظات امام رقمك
تمر علي فيها سنوات عمري كما شريط سينمائي
.
.
واتذكر
اول تلفون شريتة لي كان
نوكيا اسفار سنة 1993
وكان من اول 600رقم وزعتهم شركة الاتصالات
لشريحة الGSM
وقلتلي ساعتها

"شعليج يبا..تستاهلين ...خلاص بفتك من مناشبج لي بتلفوني
.....شريت لج تلفون بروحج..ورقمة كشخة بعد.."

وساعتها خزنت رقمك ....بتلفوني

وكنت تدق علي وانا بالجامعة
بين المحاضرات
وتقولي
"اذا طلعتي دقي وقبل لا تدشين المحاضرة الثانية بعد دقي"
واقولك
"يبا ترى والله فشلة جدام رفيجاتي جنكم مو واثقين فيني.."
وكنت تقول
" احسن عشان يدرون عندج تلفون.... مو تبين تكشخين على قولتج"

وكل ما دقيت وقلت لك انا بالسيارة تسدة بويهي
وتزفني من ادش البيت وتقول
"لاتردين عالتلفون وانتي تسوقين..."

لما تزوجت...
كان رقمك اهو المنقذ
لما ادق عالبيت وتقول لي الخدامة
"ماما وبابا راح برة من زمان مادري وين..."

ما قدرت....

حاولت......

رغم مرور اكثر من  7 سنوات

على وفاتك
مازال الرقم مخزن في النقال

كل ما مريت على الارقام

يمر رقمك بعيني

وانتفض بتنهيدة يرووووح فيها قلبي بعيييييد ويرجع

وكل اللي بايدي اني اقول

الله يرحمك يا يبا

تاخذني الدنيا والهى فيها

لكن مهما ارووح ارد ارجع وادور رقمك

وجنة مافي شي يقدر يذكرني فيك

او يخلي الوصل دائم الا هالرقم

احيانا يقص علي ابليس

واضغط على زر الاتصال

واغمض عيني....

"الرقم المطلوب غير داخل في الخدمة......."

واضحك...

واقول لنفسي...

يعني اشكنتي متوقعة تسمعين؟؟

استغفرك ربي واتوب اليك

اعلم ان الموت حق

ولا ابكي اعتراضا لكنها

روحي من تفضفض


من جم يوم دقيت الرقم
جان يلقط الخط....
وقعد قلبي يدق
وطلعت لي وحدة...

"..نعم..."
تبلعمت شوية بس لازم ارد
" آسفة اختي داقة غلط ...سامحيني..."

ضاق خلقي...
لاني ماقدر ادق على رقمك مرة ثانية

بس...
أوله عليك غصبن عني
ومهما صار ماراح امسح رقمك من نقالي
وبيتم مسجل اسم
"...أبوي  "
بالcontacts

_______________

اللهم اغفر له وارحمة

وابدلة دارا خيرا من داره

واهلا خيرا من اهلة

واجمعني به في جنات النعيم