ليش؟؟؟
بالكويتي...إشحقة!!!
يعني بناتهم غير....ماصدق
يعني حريمهم أحسن..لايمكن
شنو اللي تمتلكة الغير كويتية (بدون تحديد لجنسية معينة)
يجعل الرجل الكويتي يعتقد ويتيقن انها احسن من الكويتية
ويقدم على الزواج منها ضارب بعرض الحائط بكل مايمكن
ان يتعرض له من انتقادات من اهلة او ربعة ولا يفكر بالعيال
اللي الله بيرزقة فيهم شلوون راح يندمجون بالمجتمع الكويتي
اللي له خصوصية عجيبة ومحببة الى نفسي واحبها وااااايد
خلونا نمشي حبة حبة....
نبدي بالمهم من وجهة نظرهم...مو نظري
الجمال...
ماراح اقول احنا اجمل
بس احنا املح واحلى
ولاتشوفون الفنانات او المذيعات الكويتيات
لألألأ...تعالوا شوفوا البنات العاديين باستقبال والا بعرس
والا بيمعة...جنهم البخت ذوق ولبس وسنع وكشخة
والا يعني اهما مايحطون ميك اب كلش؟؟؟؟؟
الادب...
أخوي وولدعمي وولد خالتي....
أقولك عاملني وكلمني وتصرف معاي مثلها
وشوف تالي الحشيمة...مع ان في بنات شايفين
الضييم وساكتين
بس الريال مايحشم الا اللي يخاف منهم
والا ليش يعني ..تخاف من الغرب وتحشمهم
وتحسب حسابهم والنسيب ليصار منك وفيك
قعدت له عالوحدة..وناشبت البنية على اهلها
الصرف....
اظن ماراح اتكلم وايد بهالموضوع...
احنا نعطي ما ناخذ...
والا غيرنا تنشف ريجك وريج فريجكم بعد
تاخذ من ابوك اذا ما عندك
والا الكويتية
....ماتنطرك تروح الجمعية تييب الاغراض
اهي تروح...
....تشتري من السوق وماتنطرك تدفع لها او لعيالها
مادري شقول اكثر....!!
اذا انت مضطر ....عزيزي الكويتي
ليش تدخلها بملف الجنسية!!!!!!!!!
يعني انت يوم خذيتها ماكنت راضي بجنسيتها
ترى السالفة فيها منفعه وفايدة وانت مدمغ على مخك
والا ليش يحنون على الجنسية من ياخذونكم ياحظي
الله يهديكم....
لحد ياخذ الموضوع بحساسية
بس والله منبطة جبدي من تركيبة البلد السكانية
صارت تفشل....
وشاطرين نضحك على قطر ليش جنسوا افارقة
شوفوا عمركم اول .....
اللي امة مو كويتية من الزملاء والزميلات يسامحني ....
سؤال أخير....
تهقون الكويتية لو تاخذ غير كويتي....
تقولة ابي جنسيتك وما ابي الكويتية.....
ماتصير.....وماتسويها....
تمسوا على خير ومحبة...
هناك 22 تعليقًا:
مساء الخير
كفيتي ووفيتي وذكرتي اكثر الاسباب الي تخلي الكويتي يفكر ياخذ غر كويتيى ورديتي عليها
وترى الكويتي يدري ان الكويتية بنت عز وسنعه ورزينه , لكن الكل صار ينتقها ومحد يمدحها على العكس يمدحون غير الكويتية
ومثل ما يقول وزير هتلر
"اكذب اكذب حتى يصدقك الناس ثم ستصدق نفسك"
الشاب الي يفكر يتزوج يسمع كلام يخليها يبعد عن بنت ديرته ويسمع كم بعد يحببه بغير الكويتية الي ما عرفها كثر بنت ديرته ,,
هذا الي اشوفه
شكراً لج
تحياتي ,,
عظمة على عظمة ياست:)
وعجبتني جملة عاملني عدل وشوف الشيمة فعلا
لكل فعل ردة فعل
شوفي سلمى وعليه عليها في احد بسنعها بذمتج؟
وكاهي كويتيه ظهر وبطن
بس ااااه ماقول الا اااه :)
وترى لوك المدونة
مع انه اسود بس حده حلو...
ومادري ليش احسه لايق لج..
احب الاسود ملك الألوان
حبي:**
نمووول...
ياهلا ويامرحبا
مساء النور
والله ياخوي...اتمنى اكون وفيت الموضوع حقة
بس اكيد في اسباب خاصة مانعرفها..
والله ما يذم الكويتية الا فاشل وحاقد وحسود بعد
حياك الله
سلة ميوة...
وااااي ياحلوج انتي...
عيونج الحلوة يابعد قلبي...
اي والله ياوخيتي محد مثل سنعنا بس آآآآآخ ليش عميان مادري.....
سكتي ياسلة فيني حجي وااااايد بس ماينقال...(:
مساج خير وسعادة يارب
صباحج النور و البنور
مشالله موضوعج مهم و حساس الكويني اذا بيتزوج بنت الديرة سأل عن عرج عرجها و عن طوايف اللي خلفوها و لا يسمع عنها نتفه الا عذرب فيها و تركها بس الاجنبيه حلوه على قلبه مهما سمع عنها و شاف منها مع العلم ان جميع الشعوب تختلف عن عاداتنا و تقاليدنا حتى لو كانوا مسلمين
تقبلي مروري و مشاركتي
تحياتي
السلام عليكم ورحمة الله وبركاته
هالموضوع يحر يا اختي بفهم ليش يقبلون فيها بخرابها بعدم نظافتها بسوء تصرفها و دايم لها عذر غريبه ماتعرف و بنت الديرة يمشيها على الحبل وما تعجب و هي السنعه و اللبس والتزقرت كله عندها طبعا غير العطور و الخنه كون هالموضوع يعني لي الأجانب علاقتهم مع الأطياب مو مثلنا ..
و يا حبيبتي قالوا الأوليين حلاة الثوب رقعته منه وفيه بس وين إلي يسمع و يقنع ...
الله يهني سعيد بسعيدة... والزواج توافيج وقسمة ونصيب
انا بس سالفة الجنسية اللي تغثني
اجنبية تزوجت كويتي... خير ان شاءالله؟ وبعدين! ليش تعطونها الجنسية!
اهو لما ياخذ غير كويتيه يدور على الرخص
لا دور على سنع ولا حلاة
ماشفت واحد ماخذ غير كويتيه مرته حلوة او سنعه استغفر الله
ومابي اعيب لا باجر ربي يبتليني بعيالي
ما يدري هاللي استسهلها باجر تدفعه عمره وعمر اهله
صباح الخير
:*
انا اقولج ليش الرياييل يشوفون الغير كويتية احسن من الكويتية
لسبب واحد
شوفي مسلسلاتهم حاضر ابن عمي و تؤبرني و تبوس ايدينه(مع احترامي الشديد لكل العرب)بس انا اقصد تأثير الاعلام بالناس
و تلصق هالصورة بعقول الرياييل علبالهم كل الاجانب جذي
و شوفي مسلسلاتنا حسبي الله عليهم
كل مسوين حريمنا نسورة و الصوت اللي يلعلع و الجبروت و بس مهتمين بالكشخة و المكياج
ظلمونا و شوهوا صورتنا مع بس عند الريال الكويتي عند كل الناس اللي يتابعون مسلسلاتنا
تأثير اعلامي بحت
مسا الخير
والله انج يا ليوان يبتيها ييب.. و الحجوه اللي صار لها مده تقرقع بقلبي قلتيها
صج صج مادري شنو شايفين بغير الكويتيه
و الشي اللي اتحسس منه و يبط جبدي سالفه التجنيس .. اي ليييييش؟ مو انت خذيتها بجنسيتها هذيج و كنت راضي فيها ، ليش الحين تجنسها
والله تنبط جبدي .. الاغلبية قاعدين يشوهون سمعة الكويتيات
حرام حرام حرام يعطونهم الجنسيه
و بعدين الريل لي خذا وحده مو كويتيه ما يفكر بعياله .. والله يعايرونهم اليهال بالمدرسه و اليهال لو اهما يهال هم معايرهم يحر و مو هين
شحقه يعني؟؟ شتسوى عليه ؟ شفيها الكويتيه
و على قولتج الكويتيه تعطي ما تاخذ، عكس غير الكويتيه تاخذ اللي وراه و دونه
منبطه جبدي من هالموضوع و لو بتلكم ما راح اخلص ، اعذريني طولت عليج بس من القهر
و برافو عليج بردتي جبدي
دلوولي..
هلا والله فيج
صاجة لو يدري بس انها كلمت واحد بالجامعة بالغلط والا ضحكت حق ولد جيرانهم جان قال لا مابيها فعلتها وتركتها....
الله يهديهم
ومقيولة...
ماتعرف قديري لين تجرب غيري
سعيدة بمرورج الاول
حياج الله
الجودي...
ياهلا والله
ادري الموضوع يحر
ويقهر بعد...
وما تحجيت الا انه زايد
والحكومة تشجع بعد تعطيهم الجناسي بسهالة وجن احنا ميتين عليهم مو العكس...
الساعة المباركة ياوخيتي
لووووول والله بردتي قلبي بكلامج :)
صج سالفة الزواج من غير الكويتية تقهر وتنرفز وخاصة لما تسألين الشاب ليش ما تبي تتزوج كويتية ؟!
بكل برود واستهزاء يقولج الكويتية ما تنفع تكون زوجة !
آنا أتوقع اللي تفكيره من هالنوع ما يستاهل ياخذ بنت الديرة ولا يستاهل سنعها وذرابتها
يستاهل وحدة تسحب منه لين تخليه يطر وأخير شي تاخذ عيالها وتروح ديرتها وتحرمه حتى شوفتهم
مشكورة على هالموضوع المهم
تحياتي :)
جندل...
ياحياالله السنيوريتا...
اهي الجنسية كل السالفة بالموضوع
والا منو تخلي اهلها وتعيش بعيد عنهم
عشان خاطر عيون الكوايتة المزايين يعني .... (:
والا من حلاة جونا....
يعني انا آخذ بلجيكي يمكن اقول ديرتهم برد بالصيف وما تنزل درجة الحرارة عن 20 واييب اهلي وطوايف اللي خلفوني واجنسهم...حق التبرد
بس هذي اشتبي؟؟؟؟؟؟
كل السالفة هالحمرا مادري الحين صارت سودة....واللي وراها من مميزات
واعذروني ياحلوييين .....
الزين....
أي رخص الله يهداج الحين هابين يشرطون بالمؤخر ....
والله قبل لا يفكر يطلقها يحسب مليون حسبة لا ويطلع خسران بعد
صج ماتبي مهر ولا عرس ولا شبكة ولا.....
بس والله تالي على قولتج تدفعة دم قلبة ....
وعلى شنو عاد....الله يستر عليهم
الساعة المباركة
وخلصيلنا سالفة السندباد الله يعافيج
علقتينا....(:
مجموعة انسان...
اهلا فيج وبالمرور الاول ...
التاثير الاعلامي له دور ...صح
بس هل كان التاثير الاعلامي موجود قبل 20 او 30 سنة...مااعتقد
الحين اي واحد يشوفونة مو صاحي والاعقلة على قدة قالوا له خذ اجنبية ترضى فيك...وماتتطلب... واللي خبرج زاهبين وما يردون احد...
الله يكافينا شرهم....
ويهدي عيالنا ويفتح عيونهم وقلوبهم
الساعة المباركة
هوب...
مساج الله بالنور والكرامة...
اسم الله على جبدج من البط ياوخيتي
وهالحجوة تقرقع بقلوب وايدة بس الشكوة لله....
اشوف الامهات الكبار بالسن يحترون لما يسمعون ولد فلان خذا لبنانية..والا سورية..والا امريكية...
ليش؟؟؟ شفيهم بناتنا....
ماتصبر عليك الا بنت ديرتك ياخوي صدقني...
شنقول الحجي وايد والله الهادي
والمدونة وراعيتها تحت امرج
لاتعتذرين ...
حياج الله والساعة المباركة
امواج...
الله يبرد قلبج بالجنة قولي آمين
والله اللي موعاجبته الكويتية اكيد ماقدر يطولها عشان جذي تعنفق عليها
وبعدين يحسون ويتحسفون...
آنا المكان اللي اشتغل فية حساس وتمر علي معاملات اصحابها حصول عالجنسية...حريم ومتجنسات على ازواجهم...
تعالي شوفي الاشكال
الحمدلله الذي عافانا....
الفلبينية..والهندية..والمغربية...
هذا غير دول الخليج والشام..
شوفي المعاش شلون يصير وشوفي شلون تكلمج
"يلا خلصوا معاملتي بسرعة..بروح اعدل وضعي بالدوام..وبالتامينات"
الله يعين قلبي عليهم...
مقتثة وماقدر اتحجى...شغلي...
حياج الله وهذي الساعة المباركة
خليه ياخذ غير كويتية وعليه بالعافية اللي يصير له ،، يستاهل !!
***
الليوان ، خليني أقول لج سالفة واحد من الأهل ، بدون ذكر الأسماء..
الله يسلمج واحد من أهلنا أخذ أمريكية ، السنع كله ، الذوق ، الذرابة ، الطبخ ، شي شي ما ينوصف ، بيتها لما نزورها نبتهر من كل شي ، طبعا بنوه على نظام أمريكي ، وكل شي فيه حلو ، لما ندخل عنها نصير جزء من قصة الزين ( السندباد مع مرجانة ) خخخخ
المهم !
يابت منه بنات وأولاد !!
وبعد سنين ،، ملت الحبيبة ، وقالت انا برجع أمريكا !!
حاول فيها ماقدر ! مني مناك ماكو فايدة !!
فجأة ، طقت تذاكر لها أهيا مع البنات وسااااااافروا !!
والقانون معاها لأن البنات تجاوزا 18 سنة !!
البنات أسماءهم عربية وجناسيهم كويتية ، ومن عايلة معروفة! وعايشين في أمريكا مع أمهم من 10 سنين ما شفناهم!!
اللي ما يبي الكويتية كيفيه ، احنا بعد ما نبيه!
:)
مي...
ياهلا ويا مرحبا
والحمدلله عالسلامة
آنا حاولت اعلق عندج واتحمدلج بالسلامة بس ماقدرت مادري ليش معلق عندي...
إهي القصيص واااايد وانا اختج
واللي يحر ان الواحد فيهم ما يتعلم من تجارب اللي قبلة....
الله الهادي بعد شنقول بس آنا اتغمض على هالبنات اللي قاعدين ....
زين وسنع وذرابة وشهادات والنصيب واقف....
حياج الله وهذي الساعة المباركة
الزواج قسمة ونصيب
واسباب التفكير بغير الكويتية كثيرة لسنا في مجال حصرها وهي بالنهاية حل لمن يريد أن يتزوج ولا يحصل له الزواج من كويتية لأي سبب كان
وفي فترة من الفترات اللي مرت على الكويت إضطر الرجال العائدين من الغوص بالزواج من الدول المحيطة بالكويت لموت معظم الشعب الكويتي بالطاعون !!!
المهم أن لا يقلل أحد من شأن الزوجة الكويتية
فالحريم حريم في كل بلد
والعيوب لا تنحصر على جنسية دون الأخرى
!!!
تاريخنا الكويتي زاخر بقصص زوجات كويتيات وأمهات فاضلات
وزاخر ايضا بقصص زوجات غير كويتيات ربت أولاد يفتخر بهم
يا أختي اللي ما يطول العنقود يقول حامض من حقد وغل وغيرة عمياء
والأعلام فعلا تعمد بإضهار المراة بصورة لا نعرفها بالواقع
وأيضا صورة الرجال وصورة البيت الكويتي بشكل عام
نيكون...
حياج الله يانيكون
آنا معاج الزواج توافيج وقسمة ونصيب
بس ليش التعذرب...
وبعدين اللي ياخذ غير كويتية يقولج ما لقيت وحدة تستاهل او تسوى..
كل هالبنات وما لقيت!!!!!
أكيد عمي....مع الأسف
آنا ما قول الكويتية مافيها عيوب بس غيرها مو أحسن منها....
عالعموم...
حياج الله والساعة المباركة
إرسال تعليق